У Парыжы затрыманыя каля ста ўдзельнікаў пратэстаў супраць змянення клімату
Сотні тысяч дэманстрантаў па ўсім свеце выйшлі на маршы пратэсту напярэдадні парыжскага саміту ААН па кліматычных зменах. У Парыжы паліцыя ўжыла слёзацечны ды шумавыя гранаты і затрымала каля ста ўдзельнікаў пратэстаў.
Фота AP
Удзельнікі маршаў па ўсім свеце патрабуюць неадкладных і больш рашучых дзеянняў з мэтай спынення змянення глабальнага клімату, прычына якога — дзейнасць чалавека. Буйны марш прайшоў у Лондане, пратэсты запланаваны ў Нью-Ёрку, Рыа-дэ-Жанейра і Мехіка.
У Парыжы, дзе ў панядзелак афіцыйна адкрываецца 21-я Сусветная канферэнцыя ААН па клімаце (COP-21), пасля нападу ісламістаў два тыдні таму былі забароненыя ўсялякія дэманстрацыі і іншыя масавыя грамадскія мерапрыемствы.
© EPA/STEPHANIE LECOCQ
Аднак гэта не спыніла арганізатараў пратэстаў. Прадстаўнікі экалагічных арганізацый напачатку вырашылі адмовіцца ад дэманстрацыі ды абралі іншыя магчымасці выказаць сваю пазіцыю. Так, уздоўж бульвараў тысячы актывістаў сфармавалі "жывы ланцуг". Па розных ацэнках, ад 4,5 тысяч да 10 тысяч чалавек усталі, узяўшыся за рукі, уздоўж некалькіх бульвараў на ўсходзе горада, утварыўшы жывы калідор. Акцыя прайшла без эксцэсаў. Ініцыятарам мерапрыемства выступіла грамадская арганізацыя "Кааліцыя клімат 21", якая аб'яднала звыш 130 розных асацыяцый, што патрабуюць ад уладаў рашучых дзеянняў для скарачэння шкодных выкідаў у атмасферу, адзначае "Еўраньюс".
Але пазней сотні ўдзельнікаў акцыі, не задаволеныя дазволеным метадамі самавыяўлення, накіраваліся на Плошчу Рэспублікі, дзе пачалі закідваць паліцэйскіх камянямі, абуткам і іншымі прадметамі і выкрыкваць: "Надзвычайнае становішча! Паліцэйскае дзяржава", маючы на ўвазе ўведзеныя ў Францыі ўзмоцненыя меры бяспекі пасля тэрактаў 13 лістапада, паведамляе ВВС.
Больш за 10 тысяч пар абутку былі выстаўленыя іншымі актывістамі-эколагамі на плошчы Рэспублікі. Такім сімвалічным спосабам пры захаванні забароны на масавыя шэсці абаронцы навакольнага асяроддзя пазначыла сваю прысутнасць у цэнтры Парыжа папярэдняя мірная акцыя. На думку арганізатараў гэтай акцыі, абутак можа сімвалізаваць і дарогу ў будучыню, калі палітыкі прымуць меры да абароны планеты і супрацьстаяць зменам клімату. Увесь гэты абутак планавалася перадаць дабрачынным арганізацыям для дапамогі маламаёмасным. Удзел у гэтай акцыі прынялі, у тым ліку, публічныя асобы. Пару чаравік перадаў Парыжу нават Папа Рымскі Францыск, які выказаў салідарнасць са змагарамі за прыроду. "Пантыфік хацеў сімвалічна паўдзельнічаць у гэтым мерапрыемстве і адправіў сюды свой абутак", — пракаментаваў у эфіры тэлеканала BFM-TV бразільскі кардынал Клаўдыё Хумес, які прыехаў у французскую сталіцу па даручэнні Ватыкана, паведамляе ТАСС.
Прэзідэнт Францыі Франсуа Аланд рашуча асудзіў дзеянні дэманстрантаў, якія арганізавала беспарадкі на плошчы Рэспублікі ў Парыжы, і перасцярог іх ад паўтарэння такіх эксцэсаў у дні правядзення ў сталіцы 21-й Сусветнай канферэнцыі ААН па клімаце. "Мы ведалі, што існуюць такія парушальнікі парадку. Яны не маюць нічога агульнага з абаронцамі навакольнага асяроддзя і з тымі, хто жадае поспеху канферэнцыі COP-21. Іх адзіная мэта — стварэнне такога кшталту інцыдэнтаў", — сказаў Аланд. Як падкрэсліў французскі прэзідэнт, улады рэспублікі "не збіраюцца трываць такія паводзіны і зробяць усё, каб гэта не паўтарылася", паведамляе ТАСС.