У Мінску пройдуць перамовы Лукашэнкі, Пуціна і Назарбаева

Пасяджэнне Вышэйшага еўразійскага эканамічнага савета на ўзроўні кіраўнікоў дзяржаў пройдзе сёння ў Палацы Незалежнасці пад старшынствам Аляксандра Лукашэнкі.



Паводле інфармацыі прэс-службы прэзідэнта Беларусі, на парадку дня — абмеркаванне ходу працы над праектам дагавора аб Еўразійскім эканамічным саюзе, а таксама рэалізацыі плана мерапрыемстваў ("дарожнай карты") па далучэнні Арменіі да Мытнага саюза і Адзінай эканамічнай прасторы Беларусі, Казахстана і Расіі. 
Падчас саміта запланаваныя двухбаковыя сустрэчы Лукашэнкі з Пуціным і Назарбаевым. 
"Чакаецца, што Пуцін і Лукашэнка абмяркуюць ключавыя знешнепалітычныя тэмы, у тым ліку сітуацыю ва Украіне, сумесную працу па далейшым умацаванні СНД — з улікам старшынства Мінска другі год запар у гэтай арганізацыі", — паведаміў на мінулым тыдні памочнік прэзідэнта РФ Юрый Ушакоў. 
Паводле яго слоў, асноўная ўвага падчас перамоў будзе надавацца пытанням гандлёва-эканамічнага супрацоўніцтва. Ушакоў зазначыў, што Беларусь знаходзіцца на пятым месцы сярод гандлёвых партнёраў Расіі пасля Кітая, Нідэрландаў, Германіі і Італіі, па выніках 2013 года тавараабарот з ёй склаў 39,7 млрд. долараў. Удзельная вага Расіі ў знешнім гандлі Беларусі перавышае 49%, а назапашаныя расійскія інвестыцыі складаюць 5,5 млрд. долараў. 
Што да перамоў у трохбаковым фармаце, то на іх Беларусь мае намер настойваць на неабходнасці ліквідацыі ўсіх выключэнняў і абмежаванняў у будучым Еўразійскім эканамічным саюзе (ЕАЭС), пра што неаднаразова заяўлялі ў Мінску. 
Гэтае пытанне ўзнімалася 16 красавіка на сустрэчы Аляксандра Лукашэнкі з прэм`ер-міністрам Міхаілам Мясніковічам. Лукашэнка, у прыватнасці, цікавіўся вынікамі перамоў прэм`ер-міністраў Беларусі, Казахстана і Расіі, што прайшлі напярэдадні ў Маскве. "Гэта вельмі важна напярэдадні сустрэчы кіраўнікоў дзяржаў у Мінску 29 красавіка, — падкрэсліў ён, гаворачы аб ліквідацыі выключэнняў і абмежаванняў у ЕАЭС. — Гэта павінна быць этапная, фундаментальная сустрэча, бо пасля гэтага ўжо не застаецца часу на дапрацоўку і падпісанне фактычна дагавора аб эканамічным саюзе". "Калі мы будуем саюз і імкнемся да таго, каб тут не было ніякіх межаў, значыць, не павінна быць ніякіх выключэнняў і абмежаванняў у перамяшчэнні тавараў, рабочай сілы, капіталу — гэта асноўная мэта", — заявіў Лукашэнка. 
У адказ Мясніковіч зазначыў, што з боку Казахстана і Расіі "ёсць жаданне крыху неадназначна сфармуляваць" тыя ці іншыя палажэнні ЕАЭС. "Беларускі бок адназначна заявіў пра тое, што мы за агульны рынак без выключэнняў і абмежаванняў, які павінен функцыянаваць з 1 студзеня 2015 года. Калі якісьці бакоў нязгодны ў гэтым браць удзел, мы будзем вырашаць тады на двухбаковай аснове. Але прынцыпы тыя ж: роўныя ўмовы для гаспадарчай дзейнасці нашых суб`ектаў. Безумоўна, не павінна быць ніякіх выключэнняў і абмежаванняў як колькасных, гэтак і тарыфных ва ўзаемным гандлі", — падкрэсліў прэм`ер-міністр. 
Між тым расійскі прэм`ер Дзмітрый Мядзведзеў пасля перамоў са сваімі калегамі па мытнай "тройцы" 15 красавіка паведаміў журналістам, што Расія, Беларусь і Казахстан прасунуліся ў вырашэнні праблемных пытанняў, якія стаяць на шляху стварэння ЕАЭС. "Мы прасунуліся па ўсіх істотных, адчувальных тэмах: па нафце і нафтапрадуктах, па газе, транспарце, уключаючы як аўтамабільны транспарт, гэтак і кабатажныя перавозкі, па сельскагаспадарчых пытаннях", — заявіў Мядзведзеў. 
Дагавор аб стварэнні ЕАЭС павінен быць гатовы да мая 2014 года і набыць моц на прасторы Мытнага саюза 1 студзеня 2015 года.
БелаПАН