Дональд Трамп: ЗША знаходзяцца ў поўнай гатоўнасці да ядзернага канфлікту з Расіяй
ЗША літаральна ўпрошваюць Расію ўскочыць у апошні вагон цягніка, які сыходзіць, і дазволіць не прымяняць супраць РФ санкцыі і тарыфы. Аднак Расія любыя падобныя заклікі ўспрымае як слабасць і дамаглася эскалацыі абстаноўкі да пагрозы ядзернай вайны. Ідзе 1256-ты дзень поўнамаштабнай вайны РФ супраць Украіны пра саўдзеле ў агрэсіі рэжыму Аляксандра Лукашэнкі.
Малюнак з vgtimes.ru
За мінулыя суткі ва Украіне зафіксавана 172 баявыя сутыкненні, паведамляе Генштаб УСУ ў ранішняй зводцы 2 жніўня.
На Пакроўскім кірунку адбылася траціна атак — 66 боесутыкненняў у раёнах Папова Яру, Маяка, Разіна, Новаэканамічнага, Лысоўкі, Луча, Зверава, Удалага, Дачнага і іншых.
На Новапаўлаўскім кірунку Сілы абароны Украіны адбілі 23 атакі расійцаў у раёнах Аляксандраграду, Паддубнага, Малееўкі, Воскресенкі і Новаполю.
На Ліманскім кірунку расійцы атакавалі 20 разоў, спрабуючы прасунуцца паблізу Карпаўкі, Ямпалоўкі, Студні, Зялёнай Даліны, Торскага і Дуброва.
На Купянскім кірунку зафіксавана 10 атак расіян каля Галубоўкі, Загрызава, Лазавой і Кандрашоўкі.
На Паўночна-Слабажанскім (Курскім) кірунку адбылося 8 атак, на Прыдняпроўскім кірунку падраздзяленні РФ сем разоў спрабавалі ісці ў наступ. Па шэсць атак на кожным адбылося на Северскім і Тарэцкім кірунках.
* * *
Расійская армія спрабуе знайсці маршруты для схаванага перамяшчэння войскаў у Пакроўск, паведамляе камандаванне аператыўна-стратэгічнай групоўкі войскаў «Хорціца».
«На Пакроўскім кірунку расійскае войска не пакідае спробаў блакаваць Пакроўска — Мірнаградскую агламерацыю з усходу і поўдня», — распавялі ў АСГВ.
«У напрамку Пакроўска акупанты праводзяць разведку маршрутаў для схаванага перамяшчэння. Аднак сілы абароны выяўляюць і знішчаюць праціўніка», — паведамілі вайскоўцы.
* * *
Расія ў ноч на 2 жніўня атакавала Украіну 53-ма беспілотнікамі. 8 з іх былі рэактыўнымі. Па даных Паветраных сіл Украіны, збіта і задушана 45 з іх.
Увечары 1 жніўня расійскія войскі атакавалі Кіеўскі раён Харкава беспілотнікам тыпу «Маланка». Дрон трапіў паблізу шматкватэрнага дома, у выніку чаго пацярпелі 11 чалавек, сярод іх трое дзяцей 9 і 10 гадоў і немаўля 5 месяцаў.
У выніку расійскіх абстрэлаў Днепрапятроўскай вобласці пацярпелі прынамсі тры чалавекі, разбураныя і пашкоджаныя аб'екты грамадзянскай інфраструктуры.
У ноч на суботу, 2 жніўня, расійскія войскі нанеслі ўдар па цэнтральнай частцы Балаклеі ў Харкаўскай вобласці, зафіксавана як мінімум два выбухі, ёсць трапленне ў прыватнае домаўладанне.
У ноч на 2 жніўня ў шэрагу рэгіёнаў Расіі прагрымелі выбухі, якія суправаджаліся працай сістэм супрацьпаветранай абароны. Відавочцы паведамляюць пра атаку беспілотнікаў і буйныя пажары на нафтаперапрацоўчых заводах, выбухі на радыёзаводах і каля вайсковага аэрадрома.
У сацыяльных сетках з'явіліся відэа буйнога пажару, верагодна, на тэрыторыі Новакуйбышэўскага НПЗ у Самарскай вобласці. У вобласці ўведзеныя часовыя абмежаванні працы мабільнага інтэрнэту, а Самарскі аэрапорт прыпыніў працу.
Беспілотнікі, верагодна, уразілі АТ «Вытворчае аб'яднанне "Электрапрыбор"» у Пензе. Гэтае прадпрыемства спецыялізуецца на вытворчасці элементаў кіравання для расійскіх ракетных сістэм і сістэм сувязі.
Побач з ім размешчаны адзіны расійскі абаронны завод, які вырабляе пункты кіравання баявымі дзеяннямі падраздзяленняў СПА — АТ «Радыёзавод», які, верагодна, таксама быў уражаны.
Па словах відавочцаў, каля аэрадрома Дзягілева ў Разанскай вобласці прагрымелі выбухі. Таксама ў Разані, верагодна, быў уражаны нафтаперапрацоўчы завод. Мясцовыя каналы публікуюць відэа відавочцаў, дзе бачны слуп агню. Улады пацвердзілі факт атакі беспілотнікаў на мясцовае прадпрыемства, не ўдакладняючы, пра якое менавіта прадпрыемства ідзе гаворка.
Пра атаку БПЛА і працу СПА паведамлялі жыхары Ліпецкай, Варонежскай абласцей і часова акупаванага Крыму.
* * *
* * *
«Бразганне» ядзернай зброяй з боку Крамля — шырокая расійская кампанія рэфлексіўнага кантролю, якая праводзіцца ўвесь час, адзначаюць эксперты амерыканскага Інстытута вывучэння вайны (ISW).
У справаздачы ISW каментуюць публічную прэс-канферэнцыю расійскага дыктатара Уладзіміра Пуціна і беларускага дыктатара Аляксандра Лукашэнкі, якая адбылася 1 жніўня. Тады Лукашэнка раскрытыкаваў апошнія спробы Трампа прыцягнуць Расію да перамоваў і знайсці шлях да заканчэння вайны. Кіраўнік Беларусі адзначыў, што Трамп павінен дзейнічаць асцярожна і нібыта не павінен «дыктаваць правілы» падчас узброенага канфлікту — «асабліва ядзернай дзяржаве» накшталт Расіі.
Эксперты нагадалі, што Крэмль неаднаразова выкарыстаў пастановачныя сустрэчы з Лукашэнкам для перадачы ўскосных ядзерных пагроз, а чыноўнікі Крамля і звязаныя з імі асобы, часта выкарыстоўваюць «бразганне» ядзернай зброяй у якасці элемента кампаніі рэфлексіўнага кантролю, мэта якой — прымусіць Захад прымаць пастановы, выгадныя Расіі.
Часткай гэтай кампаніі аналітыкі лічаць і агучаныя пагрозы намесніка старшыні Савета бяспекі РФ Дзмітрыя Мядзведзева на адрас ЗША. Напярэдадні Мядзведзеў апублікаваў допіс, у якім згадаў пра савецкую сістэму аўтаматычнага ядзернага ўдару «мёртвая рука», а таксама заклікаў Трампа «ўспомніць любімыя фільмы пра хадзячых мерцвякоў».
Аналітыкі нагадалі, што Пуцін рэгулярна выкарыстоўвае экс-прэзідэнта для ўзмацнення радыкальнай рыторыкі, што павінна выклікаць паніку і страх сярод заходніх палітычных лідараў і стрымліваць падтрымку Украіны.
«Пуцін мог бы лёгка спыніць заявы з боку Мядзведзева, калі б захацеў, асабліва ўлічваючы, што Крэмль каардынуе афіцыйныя мэсэджы і цалкам кантралюе інфармацыйную прастору, Інтэрнэт і СМІ ў Расіі», — гаворыцца ў справаздачы ISW.
* * *
Прэзідэнт ЗША Дональд Трамп заявіў, што на фоне слоў намесніка старшыні Рады бяспекі РФ Дзмітрыя Мядзведзева аддаў загад разгарнуць дзве атамныя падводныя лодкі «ў адпаведных рэгіёнах», напісаў ён у сваёй сацсетцы Truth Social.
«Я аддаў загад размясціць дзве атамныя падводныя лодкі ў адпаведных рэгіёнах на выпадак, калі гэтыя бессэнсоўныя і правакацыйныя заявы акажуцца не проста словамі», — адзначыў ён.
У час размовы з журналістамі на лужку Белага дома Трамп заявіў, што Злучаныя Штаты знаходзяцца ў поўнай гатоўнасці да ядзернага канфлікту з Расіяй. Ён пракаментаваў сваё рашэнне аб разгортванні амерыканскіх ядзерных падводных лодак:
«Мы павінны былі гэта зрабіць. Мы проста павінны быць асцярожнымі. Была зроблена пагроза, і мы не лічым, што гэта было дарэчы. Таму я павінен быць вельмі асцярожным. Я раблю гэта з меркаванняў бяспекі нашага народа», — заявіў ён.
Нагадаем, Мядзведзеў заявіў, што ўльтыматумы Трампа могуць прывесці да вайны ЗША і Расіі, а потым апублікаваў допіс, у якім згадаў пра савецкую сістэму аўтаматычнага ядзернага ўдару «мёртвая рука», і заклікаў Трампа «ўспомніць любімыя фільмы пра хадзячых мерцвякоў».
* * *
Прэзідэнт ЗША Дональд Трамп прапанаваў Украіне і Расіі выхад з канфлікту. Злучаныя Штаты просяць краіны прыняць яго, заявіла выконваючая абавязкі пастаяннага прадстаўніка ЗША ў ААН Дораці Шы на пасяджэнні Савета Бяспекі ААН.
Яна адзначыла, што ўлічваючы ўзмацненне паветраных нападаў Расіі супраць Украіны і рост колькасці ахвяр сярод грамадзянскага насельніцтва, 29 ліпеня Трамп выразна заявіў, што Расія павінна падпісаць мірнае пагадненне на працягу 10 дзён.
«У выпадку невыканання гэтага патрабавання, ЗША гатовыя прыняць дадатковыя меры для забеспячэння міру. Прэзідэнт Трамп прапануе Расіі і Украіне выхад з гэтага канфлікту. Яшчэ раз просім іх прыняць гэта», — адзначыла Шы, і заклікала ўсе краіны-члены ААН «далучыцца да нас у гэтых намаганнях».
* * *
Прэзідэнт ЗША Дональд Трамп не выключыў правядзення перамоваў з Пуціным да заканчэння «дэдлайну» для ўрэгулявання вайны ва Украіне. «Паглядзім, што будзе. Мы плануем правесці некалькі сустрэч», — сказаў ён у адказ на пытанне, ці плануюцца яго сустрэчы з Пуціным.
У той жа час, са слоў Трампа, ён здзіўлены, што меў з Пуціным «добрыя размовы, падчас якіх мы маглі б пакласці канец гэтай сітуацыі, але раптам пачалі падаць бомбы».
Трамп усвядоміў, што Пуцін хоча акупаваць усю Украіну. «Ён, відавочна, моцны арэшак, так што ў гэтым плане нічога не змянілася... Тройчы ўсё атрымлівалася, і, магчыма, ён хоча паспрабаваць захапіць усё. Думаю, яму будзе вельмі цяжка гэта зрабіць», — заявіў Трамп.
* * *
ЗША і NATO абмяркоўваюць новы падыход да паставак Украіне зброі, які грунтуецца на аплаце амерыканскай зброі сродкамі еўрапейскіх чальцоў Альянсу, піша Reuters.
Паводле звестак агенцтва, краіны NATO, ЗША, і Украіна распрацоўваюць новы механізм, які будзе накіраваны на пастаўкі Кіеву зброі з пераліку прыярытэтных патрэбаў Украіны, вядомага пад абрэвіятурай PURL. Мяркуецца, што Украіна будзе вызначаць прыярытэтныя віды зброі, неабходныя ёй, у траншах прыкладна па 500 мільёнаў долараў, а саюзнікі па NATO, пад каардынацыяй генеральнага сакратара Марка Рутэ, дамовяцца паміжсобку, хто прадаставіць або аплаціць тавары з спісу.
Як растлумачыў Reuters амерыканскі суразмоўца, гэты механізм дазволіць фактычна абысці працяглыя працэдуры продажу зброі ЗША для папаўнення ўласных запасаў, а значыць, Украіна атрымае зброю хутка.