У Віцебску збіраюцца ліквідаваць аб'яднанне хворых гемафіліяй

Збіраюцца ліквідаваць Віцебскае абласное аб'яднанне хворых гемафіліяй, створанае яшчэ ў сярэдзіне 1990-х.

18 студзеня віцебскі абласны суд будзе разглядаць справу аб ліквідацыі гэтага грамадскага аб'яднання, пазоўнікам выступае Галоўнае ўпраўленне юстыцыі аблвыканкама, пішуць «Народныя навіны Віцебска».

Віцебскае абласное аб'яднанне хворых гемафіліяй было створана ў 1995 годзе з мэтай садзейнічання вырашэнню праблем лячэння і прафілактыкі гэтага захворвання, рэабілітацыйнага і санаторна-курортнага лячэння, папярэджання і зніжэння інваліднасці, у першую чаргу сярод дзяцей і падлеткаў, якія пакутуюць гемафіліяй, атрыманне імі неабходнай адукацыі, працаўладкавання і сацыяльна-бытавога забеспячэння з улікам спецыфікі захворвання.

Усе члены грамадскага аб'яднання «Віцебскае абласное таварыства хворых на гемафілію» з'яўляюцца інвалідамі 1-2 групаў з дзяцінства праз парушэнні апорна-рухальнага апарата. Больш за 90% з іх непрацаздольныя. У Віцебскай вобласці налічваецца каля сотні такіх хворых.

Гемафілія — рэдкае спадчыннае захворванне, звязанае з парушэннем каагуляцыі (працэсам згортвання крыві).