СМІ: Ракетны комплекс «Арэшнік» аказаўся ў Беларусі без пускавай устаноўкі

Саюзнікі і суагрэсары любяць пускаць пыл у вочы: Пуцін выдумляе поспехі на фронце, а Лукашэнка атрымлівае зброю, якая не працуе. У той жа час Уладзімір Зяленскі заявіў, што некаторыя дакументы «мірнага плана» могуць быць падпісаны ўжо ў студзені 2026 года. Ідуць 1407-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.

Агулам на працягу мінулых сутак ва Украіне зафіксавана 149 баявых сутыкненняў, паведамляе Генштаб УСУ ў ранішняй зводцы 31 снежня.

На Пакроўскім кірунку абаронцы Украіны спынілі 35 штурмавых дзеянняў расіян ў раёнах Радзінскага, Чырвонага Ліману, Роўнага, Пакроўску, Мірнаграду, Котліна, Удачнага, Маладзецкага, Філіі і іншых.

На Гуляйпольскім кірунку УСУ спынілі 24 спробы расіян прасунуцца каля Салодкага, Гуляйполя, Белагор’я і ў бок Варвараўкі.

На Канстанцінаўскім кірунку расійцы здзейснілі 18 атак у раёнах Аляксандра-Шульціна, Шчарбінаўкі, Пляшчыеўкі, Клебан-Быка і іншых.

На Аляксандраўскім кірунку армія РФ здзейсніла 12 атак у раёнах Ялты, Січневага, Вішнёвага, Прыволля і іншых.

На Ліманскім кірунку расійцы атакавалі 10 разоў у раёнах Зарэчнага, Навасёлаўкі, Ямпалю і іншых.

* * *

У выніку начной атакі ў Адэсе ёсць пашкоджанні інфраструктуры і жылых дамоў. У двух раёнах горада зафіксавана траплянне ў шматпавярхоўкі. У адным з дамоў узнікла ўзгаранне кватэр. З-за атакі ў частцы горада адсутнічае электра-, вода- і цеплазабеспячэнне. Пацярпелі чатыры чалавекі, з іх трое — дзеці.

У ноч на сераду, 31 снежня, Расія атакавала дронамі Белую Царкву. Паводле папярэдніх даных, адзін з дронаў трапіў у шматпавярховы жылы дом. Інфармацыі пра пацярпелых сярод жыхароў не паступала.

Каля 23 гадзін 30 снежня жыхары Туапсэ пісалі ў мясцовых пабліках, што горад атакуюць дроны. Пазней пачалі з’яўляцца кадры пажару, верагодна, на мясцовым нафтаперапрацоўчым заводзе. Пасля ўлады Краснадарскага края пацвердзілі, што ў выніку атакі беспілотнікаў сапраўды былі ўражаныя прычал у порце і мясцовы НПЗ.

* * *

У снежні Украіна значна ўзмацніла ўдары па энергетычнай інфраструктуры Расіі, усталяваўшы рэкорд па колькасці атак з пачатку поўнамаштабнай вайны, піша Bloomberg.

Паводле падлікаў Bloomberg, цягам месяца было зафіксавана не менш за 24 удары па расійскіх нафтаперапрацоўчых прадпрыемствах, нафтавых танкерах і іншых марскіх аб’ектах, а таксама па ключавых элементах трубаправоднай сістэмы. Асаблівую ўвагу УСУ засяродзілі на марской інфраструктуры. У прыватнасці, неаднаразова атакаваліся нафта- і газаздабываючыя радовішчы кампаніі «Лукойл» у Каспійскім моры.

Таксама на працягу снежня падвергліся ўдарам порты Тамань і Растоў у Чорным моры. Паралельна працягваліся аперацыі супраць «ценевага флоту» РФ.

На фоне гэтых падзей расійскія ўлады прагназуюць скарачэнне паступленняў ад нафты і газу да 23% бюджэту ў наступным годзе — гэта мінімальны паказчык за ўсю гісторыю назіранняў.

* * *

* * *

Прэзідэнт Украіны Уладзімір Зяленскі заявіў пра гатоўнасць да правядзення шматбаковых перамоў у студзені з удзелам Украіны, ЗША і еўрапейскіх краін, а таксама пацвердзіў гатоўнасць да сустрэчы з расіянамі. Пра гэта ён заявіў, адказваючы на пытанні журналістаў.

Паводле слоў кіраўніка Украіны, у студзені ўжо адбудуцца і працягнуцца кантакты саветнікаў, пасля чаго Украіна прапануе перайсці да сустрэч на ўзроўні лідараў. Ён адзначыў, што ўжо падрыхтаваны пакет дакументаў, якія могуць быць гатовыя да падпісання ў студзені, пры ўмове палітычнай волі бакоў.

Таксама Зяленскі пацвердзіў, што падчас размоў з прэзідэнтам ЗША Дональдам Трампам і еўрапейскімі лідарамі падымаў пытанне магчымых перамоў з расійскім бокам, у прыватнасці, з расійскім дыктатарам Уладзімірам Пуціным.

«Я гатовы да любога фармату сустрэчы з Пуціным. Я не баюся любога фармату нашай сустрэчы. Галоўнае, каб рускія не баяліся», — падкрэсліў ён.

* * *

Расійскі дыктатар Уладзімір Пуцін можа павесці расіян на бойню, але не гатовы прайграць вайну супраць Украіны, заявіў прэм'ер Бельгіі Барт дэ Вевер у інтэрв'ю HLN.

Кіраўнік бельгійскага ўрада каментаваў ініцыятыву Еўракамісіі аб «рэпарацыйным крэдыце» для Украіны за кошт замарожаных актываў РФ, якія знаходзяцца пераважна ў дэпазітарыі ў Бельгіі. Дэ Вевер паведаміў, што ў размове з кіраўніцай Еўракамісіі Урсулай фон дэр Ляен і канцлерам Германіі Фрыдрыхам Мерцам ён настойваў на неабходнасці захавання рычага ў выглядзе замарожаных актываў РФ для перамоў з Пуціным.

«Нельга падаць торт тры разы і пры гэтым яго з’есці. І калі мы выкарыстоўваем гэтыя грошы для фінансавання вайны, то мы таксама зыходзім з таго, што расіяне праз два гады будуць знясіленыя. Гэта ж дужы народ. Такі цар, як Пуцін, можа ўсё: марыць свой народ голадам, весці яго на бойню і тут і там учыняць генацыд. Але прайграць вайну? Гэтага ён не можа», — заявіў прэм'ер Бельгіі.

* * *

Ракетны комплекс «Арэшнік» аказаўся ў Беларусі без пускавай устаноўкі, што не пацвярджае наяўнасць паўнавартаснага баявога дзяжурства, нягледзячы на гучныя заявы аб яго размяшчэнні, піша Defense Express.

Выданне спасылаецца на публічную дэманстрацыю разгортвання расійскага ракетнага комплексу «Арэшнік» у Беларусі. На відэа зафіксавана цырымонія з удзелам асобных элементаў комплексу, але без дэманстрацыі асноўнага складніка — самаходнай пускавай устаноўкі з ракетай.

У аб’ектыў камеры трапілі толькі тры машыны: бранеаўтамабіль аховы, машына сувязі і тэхніка забеспячэння. Пры гэтым колькасць асабовага складу, які прысутнічаў на пастраенні, складала каля 70 чалавек, што не адпавядае штатнай структуры нават аднаго паўнавартаснага ракетнага комплексу, які павінен уключаць некалькі пускавых установак, камандны пункт, разгалінаваную сістэму сувязі і сродкі тылавога забеспячэння.

Разам з тым гэта не выключае паэтапнага фарміравання падраздзялення ракетных войскаў стратэгічнага прызначэння РФ з перспектывай атрымання ракет і выхаду на баягатоўнасць у 2026 годзе ці пазней, адзначае выданне.