«Справа траўматолагаў»: затрымалі яшчэ шэсць лекараў — загадчыкаў аддзяленняў і кафедр

Працягваюцца затрыманні па «справе траўматолагаў» — сёння ў СІЗА КДБ адправіліся яшчэ 6 чалавек. Сярод іх два загадчыкі аддзяленняў 6 ГКБ, двое супрацоўнікаў РНПЦ артапедыі і траўматалогіі, загадчык кафедры БелМАПО і адзін доктар 11 ГКБ, паведамляе найстарэйшае беларускае выданне (прызнанае «экстрэмісцкім»).

Затрыманыя Жыхар Мікалай Арсеневіч, Даніленка Алег Анатолевіч, Перасада Андрэй Сяргеевіч, Скакун Павал Рыгоравіч, Кезля Алег Пятровіч, Талака Яўген Лявонцявіч.

«Напэўна, на тыдні ў краіне не застанецца ніводнага доктара гэтага профілю — 90% тых, хто робіць аперацыі, ужо затрыманы. Эндапратэзаванні (асабліва складаныя) фактычна паралізаваныя. На свабодзе збольшага застаюцца тыя, хто рабіў вельмі маленькую колькасць аперацый», — кажуць абазнаныя крыніцы.

Затрыманыя сёння дактары праходзяць па 430 артыкуле КК.