Мітрапаліт Веніямін: царква асуджае ўсякі гвалт — той, хто перавысіў свае паўнамоцтвы, павінен пакаяцца
Праваслаўная царква асуджае кожны грэх, беззаконне, гвалт, несправядлівасць і няпраўду, заявіў мітрапаліт Мінскі і Заслаўскі Веніямін, Патрыяршы экзарх усяе Беларусі, 6 лістапада ў мінскім саборы іконы Божай Маці «Усіх тужлівых радасць».
Відэазапіс пропаведзі апублікаваны на партале Беларускага экзархата РПЦ. На думку праваслаўнага іерарха, сёння людзі «часта хочуць пачуць ад царквы праўдзівае слова, якое выкрывае грэх і беззаконне», і царква «павінна сказаць сваё слова», але гэта павінна быць «праўда, заснаваная на евангельскім вучэнні, а не толькі на паняцці чалавечай справядлівасці».
«Датычна той сітуацыі, у якой зараз апынулася наша краіна, можна сказаць, што па слове Сінода Беларускай праваслаўнай царквы, якое было абвешчана, мы асуджаем кожны грэх і ўсялякае беззаконне, асуджаем гвалт, несправядлівасць, асуджаем ўсякую няпраўду, — падкрэсліў мітрапаліт Веніямін. — Але не толькі асуджаем, разам з тым смуткуем і молімся аб тым, каб Гасподзь гэта выправіў. І ўсведамляем, што можна выправіць гэта не столькі словамі, колькі адпаведнымі справамі евангельскімі».
Ён задаўся пытаннем, «ці справядліва ўскладаць віну» за тое, што адбываецца цяпер у Беларусі «толькі на адзін бок», паколькі сітуацыя «з многіх складнікаў».
«Так, мы павінны пераадольваць ўсякае зло, сведчыць супраць зла, але мы перамагаем зло дабром, — заявіў патрыяршы экзарх. — І той, хто прытрымліваецца іншых перакананняў, думкі (і тут, несумненна, у храме, прысутнічаюць людзі розных перакананняў), мы павінны паважаць іншага чалавека і з разуменнем ставіцца да яго».
На думку прадстаяцеля БПЦ, «Толькі вера і прытрымліванне закона духоўнага можа нас аб’яднаць і ўсё расставіць на свае месцы». Ён адзначыў, што калі кіравацца «толькі адным законам», то беларусы стануць «самымі няшчаснымі людзьмі», аднак «і без закона нельга, паколькі, як гаварылася ў Старым Запавеце, злачынец павінен быць пакараны».
«І той, хто перавысіў свае паўнамоцтвы, той, хто паступіў несправядліва, хай перш за ўсё ў душы сваёй пакаецца, памоліцца, а калі Богу будзе ўгодна, то панясе і пакаранне па лініі дзяржаўнай — сказаў мітрапаліт Веніямін. — Але патрабаваць вока за вока, зуб за зуб у нашым сённяшнім свеце, выканання гэтай старазапаветнай запаведзі, напэўна, будзе няправільна. Евангельскі закон-закон, які заклікае нас любіць і блізкага, і далёкага, і ворага. І важна, каб мы, хрысціяне, не сыходзілі з гэтай пазіцыі».
Праваслаўны іерарх заклікаў усіх, «ад малога да вялікага, ад кіраўніцтва да сямігадовых школьнікаў», вернікаў і няверуючых, учытацца ў Евангелле ад Матфея, дзе гаворыцца, «якое павінна быць жыццё кожнага хрысціяніна», тады людзі ўбачаць «сваю няпраўду і свой уклад у тую сітуацыю, якая адбылася».
«Натуральна, па-чалавечы нам трэба будзе зрабіць і адпаведныя крокі насустрач, каб было прымірэнне. Кожны бок павінен зрабіць свой крок і быць перакананай у тым, што будзе адпаведны крок насустрач. Я прашу маліцца, каб словы, сказаныя ў гэтым храме ў святочны дзень, адгукнуліся ў сэрцы нашых людзей, каб былі добрыя перамены, каб мір і Божае благаслаўленне прыйшлі на нашу зямлю», — дадаў мітрапаліт Веніямін.