Не дасягаючы поспехаў на полі бою, Расія стварае іх бачнасць «вербальнымі інтэрвенцыямі»
Расія праваліла летнюю наступальную кампанію. Ажно да таго, што УСУ адбіваюць у яе населеныя пункты і тэрыторыі. Аднак у РФ трэба стварыць «карцінку» поспехаў на фронце — і яна ствараецца. Тым часам Трамп усё яшчэ спадзяецца на мірныя перамовы. Ідуць 1285-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.
На фронце ва Украіне за мінулыя суткі зафіксавана 182 боесутыкненні, паведамляе Генштаб УСУ ў ранішняй зводцы 31 жніўня.
На Пакроўскім кірунку абаронцы Украіны спынілі 50 штурмавых дзеянняў расіян у раёнах Шахматнага, Сухецкага, Уладзіміраўкі, Чырвонага Ліману, Лісоўкі, Зверава, Радзінскага, Котліна, Удалага і іншых.
На Ліманскім кірунку расійцы атакавалі 30 разоў паблізу Новага Свету, Студні, Дуброва, Грэкаўкі, Карпаўкі і іншых.
На Новапаўлаўскім кірунку расійцы здзейснілі 26 атак у раёнах Маліеўкі, Шаўчэнка, Зялёнага Поля, Філіялу, Ялты, у бок Навасёлаўкі, Камышевахі.
На Паўночна-Слабажанскім (Курскім) кірунку ўкраінскія абаронцы адбілі 14 атак расійцаў.
На Паўднёва-Слабажанскім кірунку УСУ спынілі 11 атак арміі РФ ў раёнах Валчанску, Глыбокага, Каменкі. На Тарэцкім кірунку расійцы здзейснілі 10 атак.
На Купянскім кірунку адбылося дзевяць атак. Па сем атак на кожным зафіксавана на Сіверскім і Краматорскім кірунках.
* * *
У раёне Дабраполля ў Данецкай вобласці Сілам абароны Украіны ўдалося спыніць прасоўванне расійцаў, заявіў спікер АСГВ «Днепр» Віктар Трэгубаў.
«Былі адсечаныя тыя дзве "клюшні", якія яны (рускія) спрабуюць туды цягнуць. Там яшчэ застаюцца ў пасадках групы расійцаў, але паколькі яны адрэзаныя ад паставак, асноўнай сваёй масы, гэта хутчэй пытанне часу, калі яны там скончацца», — сказаў ён.
* * *
Сілы абароны вызвалілі вёску Мірнае непадалёк ад Купянска Харкаўскай вобласці, паведамляе аналітычны праект DeepState. Спікер АСГВ «Днепр» Віктар Трэгубаў пацвердзіў гэтую інфармацыю.
«На гэты момант расійцаў з Мірнага адкінулі. Інфармацыі пра параненых ці забітых расійцаў няма. УСУ прасоўваюцца далей», — сказаў Трэгубаў. Раней з гэтых пазіцый расійцы маглі кантраляваць трасу на Купянск.
* * *
На мінулым тыдні, паміж расійцамі ў Херсонскай вобласці адбылася перастрэлка, паведамляе Telegram партызанскага руху «АТЭШ». Узброены канфлікт узнік паміж падраздзяленнямі 127-й разведвальнай брыгады і 24 мотастралковага палка.
«Вайскоўцы 24-га палка адкрылі агонь па пазіцыях 127-й брыгады. Тыя, у сваю чаргу, прынялі іх за ўкраінскую дыверсійна-штурмавую групу. У выніку паўстаў хаатычны стралковы бой», — сказана ў паведамленні.
Па выніку сутыкнення 21 чалавек забіты, 17 атрымалі раненні. Пасля інцыдэнту ў падраздзяленнях пачаліся праверкі, узмоцнены кантроль і допыты асабовага складу.
«Атмасфера ўнутры акупацыйных частак стала яшчэ больш напружанай: расце недавер, салдаты падазраюць адзін аднаго ў правакацыях, а камандзіры асцерагаюцца новых канфліктаў», — адзначылі ў «АТЭШ».
* * *
У ноч на 31 жніўня Расія масіравана атакавала Адэскую вобласць ударнымі беспілотнікамі, найбольш пацярпеў горад Чарнаморск і яго наваколлі. У выніку ўдару ёсць пашкоджанне энергетычнай інфраструктуры. У цяперашні час больш за 29 тысяч абанентаў без электраэнергіі. Пацярпеў адзін чалавек.
* * *
* * *
Ваеннае кіраўніцтва Расіі падае недакладныя даныя пра поспехі сваёй арміі на фронце. Такім чынам Крэмль спрабуе пераканаць краіны Захаду ў непазбежнай перамозе над Украінай, хоць насамрэч гэта не так, піша амерыканскі Інстытут вывучэння вайны (ISW).
Эксперты адзначаюць, што Крэмль запусціў скаардынаваную інфармацыйную кампанію, што дэманструе «вайсковую моц» на полі бою, каб паўплываць на Захад і памылкова пазіцыянаваць няўхільнасць расійскай перамогі.
Аналітыкі адзначылі выступ начальніка Генеральнага штаба Узброеных Сіл РФ Валерыя Герасімава, які заявіў, што расійскія войскі з сакавіка 2025 года захапілі 3500 км2 тэрыторыі і 149 населеных пунктаў.
Генерал заявіў, што з сакавіка толькі на поўначы Сумскай вобласці расійскія сілы захапілі 210 км2 і 13 населеных пунктаў, а расійскія войскі кантралююць 99,7% Луганскай, 79% Данецкай, 76% Херсонскай і 74% Запарожскай абласцей. Акрамя таго, са слоў Герасімава, з сакавіка 2025 года войска РФ захапіла блізу 50% Купянска і 10 населеных пунктаў на Ліманскім кірунку: Мірнае, Кацярынаўку, Новаміхайлаўку, Новае, Ліпавае, Рэдкадуб, Грэкаўку, Зялёную Даліну, Калодзежы і Сярэдняе.
Аналітыкі ISW заўважылі, што Герасімаў істотна перабольшыў звесткі пра поспехі войска РФ. Паводле інфармацыі экспертаў, расійскія войскі з 1 сакавіка 2025 года захапілі толькі каля 2346 км2 украінскай тэрыторыі і 130 населеных пунктаў. Гэта значыць, расійскі генерал завышае расійскія дасягненні прыкладна на 1200 км2 і 19 населеных пунктаў.
У ISW таксама паведамілі, што напраўду расійскія войскі захапілі 212 км2 на поўначы Сумскай вобласці, але кантралююць толькі дзевяць населеных пунктаў у гэтым раёне.
Паводле звестак экспертаў, расійскае войска захапіла толькі 6,3% Купянска і не кантралюе цалкам населеныя пункты Мірнае, Новаміхайлаўка, Рэдкадуб, Грэкаўка, Калодзежы, Сярэдняеі іншыя.
Герасімаў — не адзіны высокапастаўлены расійскі вайсковец, які ў апошнія дні робіць гучныя заявы аб прасоўванні расійскіх войскаў, адзначаюць эксперты. Міністр абароны РФ Андрэй Белавусаў 29 жніўня сцвярджаў, што расійскія войскі нібыта захопліваюць па 600-700 км2 на месяц. Аднак, па даных ISW, у чэрвені, ліпені і жніўні 2025 года, расійскія войскі прасоўваліся толькі на 440-500 км2 у месяц.
Аналітыкі мяркуюць, што гэтыя заявы расійскіх вайскоўцаў сведчаць пра спробу кіраўніцтва Расіі паўплываць на прыняцце рашэнняў на Захадзе, ствараючы ілжывае ўражанне, што перамога РФ непазбежная. «Масква спрабуе пераканаць Захад, што Расія непазбежна дасягне сваіх вайсковых мэтаў, і таму Украіна павінна пайсці на саступкі расійскім патрабаванням, а захад адпаведна спыніць яе падтрымку», — мяркуюць у ISW.
У справаздачы ISW таксама адзначаецца, што прывядзенне Крамлём статыстыкі тэрытарыяльных дасягненняў не ўлічвае істотных страт, якія нясе расійская армія, а таксама паступовы і павольны характар прасоўвання — ствараючы няпоўную карціну эфектыўнасці РФ на полі бою. Расійскія войскі нясуць асабліва вялікія страты з зімы 2024 года, і яны адбываюцца пры непрапарцыйна нязначных тэрытарыяльных дасягненнях.
«ISW працягвае ацэньваць, што настолькі высокія страты для Расіі няўстойлівыя ў сярэдне- і доўгатэрміновай перспектыве. Прасоўванне Расіі напрацягу многіх месяцаў застаецца ў асноўным паступовым і паўзучым, а тэмп наступу надзвычай павольны па мерках сучаснай механізаванай вайны», — гаворыцца ў справаздачы.
На думку экспертаў, абнародаванне Крамлём завышанай статыстыкі тэрытарыяльных дасягненняў без крытычнага кантэксту страт дзеля такіх дасягненняў, верагодна, з'яўляецца спробай маніпуляваць ўяўленнямі аб ваеннай эфектыўнасці расійскай арміі.
* * *
Прэзідэнт ЗША Дональд Трамп не ўпэўнены ў перспектывах сустрэчы лідараў Украіны і РФ. Але, на ягоную думку, трохбаковыя перамовы з удзелам ЗША адбудуцца, заявіў ён у інтэрв'ю Daily Caller.
«Трохбаковыя перамовы адбудуцца. Што тычыцца двухбаковых, то я не ведаю, але трохбаковыя адбудуцца. Але, ведаеце, часам людзі да гэтага не гатовыя», — сказаў прэзідэнт ЗША.
Акрамя таго, Трамп зноў параўнаў прэзідэнта Украіны Уладзіміра Зяленскага і расійскага дыктатара Уладзіміра Пуціна з «дзецьмі на пляцоўцы».
«У вас ёсць дзіця, і на дзіцячай пляцоўцы ёсць яшчэ адно дзіця, і яны ненавідзяць адзін аднаго, і яны пачынаюць пампавацца, пампавацца і пампавацца, і вы хочаце, каб яны спыніліся, а яны працягваюць. Праз некаторы час яны вельмі радыя спыніцца. Вы разумееце гэта? Гэта амаль так. Часам яны павінны крыху пабіцца, перш чым вы зможаце прымусіць іх спыніцца», — заявіў ён.
Трамп ужо прыводзіў падобную аналогію ў ліпені 2025 года. Тады ён параўнаў вайну РФ супраць Украіны з бойкай дзяцей у парку. Прэзідэнт Украіны Уладзімір Зяленскі ў адказ сказаў, што Пуцін — не дзіця ў парку, а «забойца, які прыйшоў у гэты парк, каб забіваць дзяцей».