Топ-10 фільмаў на Адвэнт

У каталікоў і пратэстантаў распачаўся перыяд падрыхтоўкі і чаканьня Раства – Адвэнт. Крыху раней у гэтым годзе пост перад Божым Нараджэньнем распачаўся і ў праваслаўных. З гэтай нагоды мы падрыхтавалі аўтарскі сьпіс з дзесяці лепшых стужак, каб належным чынам адчуць Адвэнт. Прыемнага прагляду!

Акрамя гэтай аўтарскай падборкі, іншыя сьпісы фільмаў глядзіце тут.

Нумар 10. Шчасьлівага Раства (Joyeux Noël). 2005

Гэтая стужка пра Раство і пра вайну. Гісторыя, пра якую вы даведаецеся, магла б здарыцца толькі ў казачным сьне Андэрсана альбо Ліндгрэн – але насамрэч усё было па-праўдзе!

Фронт. Першая Сусьветная вайна. Ворагі забіваюць адно аднаго тысячамі і самымі жудаснымі чынамі. Але далей паўстае неверагоднае: супернікі напярэдадні Раства, у Вігілію здолелі адсьвяткаваць сьвята разам. На Заходнім фроньце бывае рознае, і гэты выпадак назаўжды трапіў у гісторыю. Ворагі не забыліся, што перадусім яны людзі. Калі б такіх гісторыяў было больш – мы не пазналі б нашага сусьвету. Але гэта залежыць ад кожнага з нас, у кожным канкрэтным выпадку. Абавязкова паглядзіце фільм Крысьціяна Карыёна.

Нумар 9. Калядная песьня (A Christmas Carol). 2009

Бадай што самая ўдалая экранізацыя кнігі Чарльза Дзікінза атрымалася ў рэжысэра Робэрта Зэмэкіса. Адна з самых знакамітых казак, якую да дзірак зачытваюць дзеці ў Англіі, атрымала шырокую вядомасьць і ў Беларусі. Вядомы комік Джым Кэры выконвае зусім не камічную, але трагічную ролю сталага чалавека, які, як зараз кажуць, стварыў сябе сам.

Містэр Скрудж працаваў усё жыцьцё, не марнуючы нешта на прыемнасьці, але ўсё больш і больш назапашваў сродкі. На Раство, калі ўсё вакол адназаюць сьвята, ён працягваў працаваць і быў незадаволены, што яго падначаленыя зьбіраюцца дадому.

Езус кажа ў Новым Запавеце: Не ведаеце, у якую гадзіну памрэце, калі будзе ўзятыя з гэтага сьвету. Так і галоўны герой казкі памірае і глядзіць рэтраспектыву свайго жыцьця. Ці ёсьць шанец нешта паправіць? Ці адгукнецца яго сухое сэрца?

Нумар 8. Пір Бабэты (Babettes gæstebud). 1987

Дацкая стужка, якая атрымала перамогу на цырымоніі Оскар у намінацыі «Лепшы замежны фільм». Праца Габрыэля Аксэля - гэта рэдкая пярліна сусьветнага кінематографа. Да такіх фільмаў нячаста дабіраецца масавы глядач, але менавіта на такіх карцінах і існуе мастацтва.

«Пір Бабэты» - гэта ціхая, але надзвычай магутная медытацыя аўтара пра шчодрасьць, ахвярнасьць і любоў звычайнага чалавека. Дзеяньне разгортваецца ў далёкай дацкай вёсцы, а сама гісторыя адбываецца вакол Бабэты, французскай бежанкі, якая знаходзіць кут у якасьці хатняй гаспадыні ў дзьвюх строгіх сёстраў.

Калі Бабэта нечакана выйграе ў лятарэю, яна вырашае патраціць свой выйгрыш на шчодрае сьвята, вялікі пір для жыхароў вёскі. Гэта назаўсёды зьмяняе жыцьцё тых, хто побач зь ёй.

Нумар 7. Песьня Бэрнадэт (The Song of Bernadette). 1943

Гэтая стужка рэжысэра Генры Кінга можа служыць духоўным гімнам неверагодна прыгожай гісторыі з Францыі. Фільм заснаваны на рамане Франца Вэрфеля і распавядае пра жыцьцё сьвятой Бэрнадэт Субіру, маладой французскай дзяўчыны, якая ў 1858 годзе стала сьведкай серыі абвяшчэньняў Марыі ў гроце Люрда.

З тых часоў Люрдская Маці Божая зьяўляецца адным з сымбаляў хрысьціянскай Францыі. Джэніфэр Джонс увасабляе пакору і непахісную адданасьць сваёй гераіні, і гледачы сустракаюць яе шлях ад простай беднай дзяўчыны да шанаванай усім сьветам сьвятой.

Прызначэньне Джэніфэр на галоўную ролю суправаджалася пачатковым скандалам, калі аўтар кнігі быў супраць акторкі, але ўрэшце пагадзіўся з выбарам. Сама Джэніфэр Джонс цалкам заслужана ў тым годзе атрымала Оскар за лепшую жаночую ролю.

Нумар 6. Цуд на 34-й вуліцы (Miracle on 34th Street). 1947

Што знаходзіцца на гэтай самай 34-й вуліцы ў Нью-Ёрку? Вялізная ўнівэрсальная крама «Мэйсі». Яна штогод арганізуе сьвяточны парад напярэдадні Раства, дзе на чале ідзе Санта Клаўс, дакладней актор, які грае Санту. Але што рабіць, калі актор прыйшоў п’яным? Трэба неадкладна знайсьці кагосьці, хто б здолеў яго замяніць, а тым больш вось і ідзе вясёлы сталага веку чалавек з уласнай белай барадой.

Пасьля ён кажа, што ён і ёсьць сапраўдны Санта, Сьвяты Мікалай. Ну што ж: шмат хто шмат чаго сцьвярджае, але да гэтага Санты цягнуцца дзеці, а за дзецьмі бацькі, якія будуць набываць падарункі – правільна, на 34-й вуліцы.

Чароўная казачная гісторыя, у якую ўплеценыя і рамантычныя адносіны, і перажываньні маленькай дзяўчынкі, якая не ведае, ці верыць ёй у Санту, і карпаратыўныя правілы вялікай кампаніі. Калі вам не хапае чагосьці, каб узбадзёрыць сябе напярэдадні Раства – уключайце гэты фільм.

Нумар 5. Апакаліпсіс – Адкрыцьцё Яна Багаслова (San Giovanni - L'apocalisse). 2002

Рэжысэр Рафаэль Мэртэс прапануе глыбокае кіна падарожжа на тэрыторыю сучаснай Грэцыі, а дакладней – на выспу Патмас. Гэты фільм, прысьвечаны жыцьцю апостала Яна і напісаньню ім Кнігі Адкрыцьця, альбо інакш - Апакаліпсісу, апошняй кнігі Новага Запавету і ўсёй Бібліі. Аўтары паказваюць інтрыгоўную перспэктыву раньняй хрысьціянскай думкі.

Гэтая гісторыя, якая цалкам спалучаецца з рэфлексіяй і чаканьнем перыяду сьвятаў Божага Нараджэньня. Яна запрашае гледачоў паразважаць над таямніцамі веры і лёсу.

Цудоўны Рычард Харыс, у сваёй апошняй ролі прасякнуты спалучэньнем глыбокай мудрасьці і непахіснай веры, якая адлюстроўвае сутнасьць чалавека, які быў сьведкам нараджэньня хрысьціянства і вытрымаў выпрабаваньні свайго жыцьця. Рэжысэр спалучае сцэны з выгнаньня апостала Яна на выспе Патмас з бурлівымі падзеямі, якія ён прадбачыў.

Нумар 4. Quo Vadis (Quo Vadis). 1951

Стужка Мэрвіна ЛеРоя зьяўляецца лепшай з вялікай колькасьці спробаў экранізацыі рамана Генрыка Сянкевіча. Упрыгожаны дзікай экстравагантнасьцю Рыма часоў імпэратара Нэрона, фільм уяўляе сабой ідэальнае спалучэньне рамантыкі, рэлігійнага абуджэньня і палітычных інтрыгаў сталіцы.

Робэрт Тэйлар, у ролі рымскага ваеннага камандзіра Марка Вініцыя, паказвае пакручасты шлях ад нахабнага жаўнера да чалавека, які цалкам зьмяняецца дзякуючы каханьню і духоўнаму навяртаньню.

Гледачы трапляюць у Рым перыяду заняпаду.

Нумар 3. Дзесяць запаветаў (The Ten Commandments). 1956

За 33 гады да гэтай экранізацыі гісторыі пра Майсея, той жа рэжысэр Сэсіл Б. ДэМіль зьняў сваю першую вэрсію. Кожная зь іх валодае фантастычнымі якасьцямі сапраўднага мастацтва.

Другая, больш сучасная вэрсія яго грандыёзнай пастановы і візуальнага відовішча робяць фільм ідэальным кампаньёнам для вечара, прысьвечанага фундамэнтальным духоўным гісторыям. Стужка цягнецца каля 4 гадзінаў, але гэта нашмат меньш, чым 40 гадоў, напрацягу якіх габрэі хадзілі па пустыні, перш чым трапіць у Сьвятую Зямлю.

Выдатны прадстаўнік фільмаў жанру пеплум.

Нумар 2. Слова (Ordet). 1955

З самага пачатку гледача драмы Карла Тэадора Дрэйера ахоплівае атмасфэрная карціна дацкай вёскі. Менавіта ў гэтым суровым пейзажы Дрэйер малюе шчымлівую гісторыю сям'і рэлігійнага фермэра, якая балансуе на мяжы згубы надзеі.

Барацьба герояў з адсутнасьцю ці наадварот – прысутнасьцю веры зьяўляецца галоўнай ніткай гісторыі. Адзін з герояў прыходзіць да высновы, што ён – уцелаўлёны Езус у дацкай далёкай вёсцы. Суровы скандынаўскі сьветапогляд відаць не гатовы прыняць такое сцьвярджэньне. Але развязка павінна адказаць на ўсе пытаньні.

Нумар 1. Гэта цудоўнае жыцьцё (It's a Wonderful Life). 1946

Яшчэ адным цудам зьяўляецца гэтая стужка. Пасьля вайны відавочна лунаў запыт на нешта, што здолее падараваць надзею для ўсяго чалавецтва. Фрэнк Капра зьняў шэдэўр кінематографу. У галоўнай ролі – суперзорка Джэймс Сьцюарт, які грае чалавека, што зьбіраецца скончыць жыцьцё самагубствам. Вы можаце заўважыць - такі сабе пачатак для фільма на Раство.

У гэтую ж сэкунду дзеяньне фільма спыняецца, і мы прысутнічаем на нарадзе анёлаў, дзе яны дзівяцца, што ж прывяло чалавека на самы край яго існаваньня. Яны перамотваюць жыцьцё патэнцыйнага самагубцы назад, каб разабрацца. Дзе тыя шляхі, якія вядуць у прорву.

Па вэрсіі амэрыканскага істытута кіно – гэтая стужка самая натхняльная ў гісторыі. Калі вайна і дыктатура падкашваюць вашае жыцьцё – гэта яшчэ не канец. Нам, безумоўна, неабходна натхненьне ў гэтыя часы.

Прыемнага прагляду!