Урсула фон дэр Ляен: Аднабаковае расчляненне суверэннай еўрапейскай краіны недапушчальнае

Еўрапейцы хацелі бы бачыць у «мірным плане Трампа» саступкі не толькі з боку Украіны, але і з боку Расіі, а таксама папярэдзілі, што пытанні Еўропы нельга вырашаць без Еўропы. Амерыка, прасоўваючы гэты план, пужае сваіх партнёраў па ЕС расійскімі ракетнымі ўдарамі. Але хіба не можа Расія ўдарыць па Еўропе і без вайны ва Украіне? Ідуць 1373-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.

Цягам мінулых сутак ва Украіне зафіксавана 213 баявых сутыкненняў, паведамляе Генштаб УСУ ў ранішняй зводцы 27 лістапада.

На Пакроўскім кірунку абаронцы Украіны спынілі 57 штурмавых дзеянняў расіян ў раёнах Уладзіміраўкі, Фёдараўкі, Ніканораўкі, Чырвонага Ліману, Радзінскага, Новаэканамічнага, Пакроўску, Котліна, Удачнага, Маладзецкага, Ялты і Дачнагап.

На Ліманскім кірунку расійцы атакавалі 44 разы каля Грэкаўкі, Новавадзянога, Новаегораўкі, Навасёлаўкі, Копанкі, Калодзежа, Сярэдняга, Радкадубу, Карпаўкі, Зарэчнага і іншых.

На Канстанцінаўскім кірунку расіяне здзейснілі 31 атаку ў раёнах Яблонаўкі, Плешчыеўкі, Русінага Яру і іншых

На Гуляйпольскім кірунку абаронцы Украіны спынілі 22 атакі паблізу Зацішша, Салодкага, Яблакава, Зялёнага Гаю і ў бок Гуляйполя.

На Аляксандраўскім кірунку расійцы здзейснілі 16 атак паблізу Іванаўкі, Зялёнага Гаю, Аляксееўкм, Прывольнага і Краснагорскага.

На Славянскім кірунку Сілы абароны Украіны спынілі 14 наступальных дзеянняў расіян у раёнах Ямпаля, Серабранкі, Дронаўкі, Навасёлаўкі, Выімкі і Сако-і-Ванцэці.

На Паўднёва-Слабажанскім кірунку расійцы 12 разоў атакавалі паблізу Ваўчанска, Сінельнікавага, Амбарнага, Дварычанскага і ў бок Калодзежнага.

* * *

Навакуйбышаўскі нафтаперапрацоўчы завод у Самарскай вобласці РФ, быў пад атакай беспілотнікаў уначы 27 лістапада, паведамляюць расійскія Telegram-каналы. ААТ «Навакуйбышаўскі нафтаперапрацоўчы завод» уваходзіць у групу ПАТ «НК "Раснафта"». Раней завод беспілотнікі атакавалі 16 лістапада і 19 кастрычніка.

* * *

* * *

Кіраўніца Еўракамісіі Урсула фон дэр Ляен заявіла, што Украіну нельга падзяляць на часткі. Калі Захад прызнае падрыў межаў суверэннай дзяржавы, гэта можа прывесці да новых войнаў, піша The Guardian.

Па словах фон дэр Ляен, Расія «не дэманструе прыкмет сапраўднага жадання завяршыць канфлікт» і працягвае дзейнічаць у рамках менталітэту, сфарміраванага з часоў Ялцінскай канферэнцыі 1945 года, якая рэгулявала пасляваенны парадак і падвяргалася крытыцы.

«Мы павінны быць зразумелыя: аднабаковае расчляненне суверэннай еўрапейскай краіны недапушчальнае, а межы не могуць змяняцца сілай. Калі сёння мы легітымізуем і фармалізуем падрыў межаў, заўтра гэта адкрые дзверы новым войнам, і мы не можам гэтага дапусціць», — адзначыла яна.

Кіраўніца ЕК дадала, што намаганні прэзідэнта ЗША Дональда Трампа па пошуку міру могуць стаць адпраўным пунктам. Пры гэтым Еўропа мае сур'ёзныя асцярогі наконт дэталяў першапачатковага мірнага плана Вашынгтона. Фон дэр Ляен лічыць, што ціск на Расію важна захоўваць, паколькі яна не дэманструе жадання завяршаць вайну.

Раней высокая прадстаўніца ЕС па пытаннях знешняй і бяспекі палітыкі Кая Калас адзначыла, што ў апублікаваным СМІ першым праекце «мірнага плана» для Украіны не ўтрымлівалася ніводнай саступкі або абавязацельства з боку дзяржавы-агрэсара Расіі.

* * *

У справе міру паміж Украінай і Расіяй не можа быць заключэння мірнага пагаднення шляхам прымусу Украіны да капітуляцыі. Таксама Украіна павінна мець магчымасць абараніць сябе ў будучыні, заявіў міністр абароны Германіі Борыс Пісторыус.

Пісторыус засцярог ад любога прымусу Украіны да «аднабаковых тэрытарыяльных саступак». Таксама ён адхіліў магчымасць абмежавання ўкраінскай арміі, адзначыўшы, што краіна павінна мець здольнасць абараніць сябе ў будучыні, а для гэтага патрэбны моцная армія і надзейныя гарантыі бяспекі — у першую чаргу ад ЗША. Таксама, паводле яго слоў, усё, што ўплывае на будучыню еўрапейскіх дзяржаў, NATO, або краін Еўрасаюза, не павінна абмяркоўвацца «над нашымі галовамі».

«Іншымі словамі, мы самі вырашаем сваю будучыню. І не павінна быць фальшывага міру для Украіны. Не павінна быць міру, які азначае капітуляцыю», — рэзюмаваў ён.

* * *

Дзяржсакратар ЗША Марка Рубіё перадаў еўрапейскім саюзнікам патрабаванне ад прэзідэнта Дональда Трампа спачатку заключыць мірнае пагадненне аб спыненні вайны ва Украіне, а ўжо потым прадметна абмяркоўваць пытанне прадастаўлення Украіне гарантый бяспекі, паведаміла выданне Politico са спасылкай на неназванага еўрапейскага дыпламата.

Рубіё падчас тэлефоннай размовы з еўрапейскімі чыноўнікамі ў аўторак заявіў, што прэзідэнт ЗША Дональд Трамп пазней правядзе перамовы па доўгатэрміновых гарантыях бяспекі Украіны, якія нібыта гарантуюць Кіеву бяспеку. Таксама адзначаецца, што менавіта такі парадак дзеянняў прадстаўнікі Вашынгтона на мінулым тыдні прэзентавалі ўкраінскаму боку.

Тым не менш выданне адзначае, што Белы дом падкрэсліў, што любы канчатковы «мірны план» будзе мець гарантыі бяспекі.

«Адміністрацыя Трампа неаднаразова пацвярджала, публічна і прыватным чынам, што любое пагадненне павінна прадугледжваць поўныя гарантыі бяспекі і стрымлівання для Украіны. Каманда прэзідэнта па нацыянальнай бяспецы працягвае працаваць з абодвума бакамі, каб пакласці канец гэтаму канфлікту і забяспечыць доўгатэрміновы, устойлівы мір», — заявіла намеснік прадстаўніка Белага дома Ганна Келі.

* * *

Міністр Сухапутных войскаў ЗША Дэн Дрыскал падчас візіту ў Кіеў, калі перадаў Украіне «мірны план» з 28 пунктаў, заявіў еўрапейскім дыпламатам аб ракетнай пагрозе з боку Расіі не толькі для Украіны, такім чынам прасоўваючы «хуткае ўрэгуляванне» вайны, піша The New York Times.

Дрыскал заявіў, што на працягу многіх гадоў Масква запускала ракеты ва Украіну амаль так хутка, як толькі магла іх вырабляць. Але, паводле яго слоў, цяпер Расія вырабляе іх дастаткова, каб назапасіць зброю вялікай далёкасці. Еўрапейскія чыноўнікі адзначылі, што намёк быў відавочным: неабходна хуткае ўрэгуляванне з-за растучай ракетнай пагрозы, якая можа выйсці за межы Украіны.

Заходнія чыноўнікі, якія прынялі ўдзел у сустрэчы з Дрыскалам і пагутарылі з NYT, назвалі расійскае нарошчванне ваеннай сілы трывожным і заявілі, што яго папярэджанне выклікала рэзананс.

Фабіян Гофман, эксперт па ракетным узбраенні з Універсітэта Осла, які сочыць за вайной ва Украіне, адзначае, што запасы Расіі толькі ўзрастуць, калі баявыя дзеянні спыняцца. «Калі Расія выйдзе пераможцам з гэтай вайны, яна можа адчуць сябе вельмі смелай у будучыні і мець велізарныя запасы дальнабойнай зброі», — сказаў ён.

NYT піша, што хоць «лічыцца малаверагодным, што Расія значна замарудзіць вытворчасць зброі нават у выпадку заканчэння вайны, спыненне канфлікту можа пазбавіць Маскву патэнцыйнага апраўдання для запуску ракет або дронаў па іншай еўрапейскай краіне».

* * *

Вайна кіраўніка Расіі Уладзіміра Пуціна супраць Украіны неўзабаве перасячэ адзнаку чацвёртай зімы, і, як піша Bloomberg, расіяне вымушаны змірыцца з яе растучым ўплывам амаль на ўсе аспекты паўсядзённага жыцця.

Ступень пакут грамадзян РФ непараўнальная з тым, што перажывае Украіна, і ў любым выпадку наўрад ці заахвоціць Пуціна спыніць вайну, аднак Bloomberg падкрэслівае ўсё больш высокія выдаткі, якія Расія нясе за сваё рашэнне пачаць поўнамаштабнае ўварванне ў лютым 2022 года.

Гэта рэзка кантрастуе з папярэднім перыядам вайны, калі валавы ўнутраны прадукт РФ рос дзякуючы інвестыцыям, звязаным з ваеннай галіной, што прывяло да росту заработнай платы амаль на 20% у 2024 годзе, стымулюючы спажывецкі попыт, але таксама спрыяючы інфляцыі.

У кастрычніку мінулага года Цэнтрабанк Расіі павысіў стаўкі да рэкордных 21%, каб астудзіць інфляцыю. У пачатку лістапада гэтага года інфляцыя знізілася да прыкладна 6,8%, але галоўная прычына гэтага — паслабленне спажывецкага попыту.

У верасні і кастрычніку ў Расіі продажы малака, свініны, грэчкі і рысу ўпалі на 8–10%. Чысты прыбытак X5 Group, найбуйнейшай сеткі прадуктовых крам Расіі, у трэцім квартале ўпаў амаль на 20%, што адлюстроўвае слабы попыт і высокія выдаткі.

У трэцім квартале 2025 года 45% усіх закрытых крам прыпадала на крамы моднага адзення — закрыўся амаль кожны другі магазін. Рынак электронікі перажывае самае рэзкае падзенне попыту за апошнія 30 гадоў — пакупнікі адкладаюць буйныя пакупкі.

Маскоўскі Цэнтр стратэгічных даследаванняў піша, што «амаль няма шанцаў пазбегнуць рэцэсіі», паколькі вытворчасць скарацілася больш чым у палове расійскіх галін. Эканамічны рост замарудзіўся да 0,6% у трэцім квартале, дэфіцыт бюджэту ў кастрычніку дасягнуў 1,9% ВУП, і Міністэрства фінансаў чакае, што да канца года ён вырасце да 2,6% ВУП.

Паводле разлікаў Bloomberg на аснове даных Міністэрства фінансаў Расіі, даходы ад нафты і газу ў студзені-кастрычніку знізіліся больш чым на пятую частку (20%) у параўнанні з аналагічным перыядам мінулага года, і склалі 7,5 трлн рублёў. І гэта было да таго, як ЗША ўвялі санкцыі супраць вядучых расійскіх нафтавытворцаў — «Раснафты» і ПАТ «Лукойл».

Па меры росту дэфіцыту бюджэту ўрад РФ павялічвае падаткі. Падатак на дабаўленую вартасць павінен вырасці ў наступным годзе і прымяняцца да больш шырокай базы. З'явіцца тэхналагічны збор на электронныя кампаненты і прылады, павялічыцца падатак пры куплі аўтамабіля.

У 2023 годзе Пуцін паабяцаў, што падаткі больш не будуць павышацца. Цяпер Крэмль даручыў СМІ проста не згадваць яго імя ў рэпартажах аб новых зборах.