«Голы перад жыццём»: У беларускага музыкі Prastora выйшлі два новыя сінглы — компас для тых, хто шукае сваё месца ў хаосе паўсядзённасці

Журналіст Улад Рубанаў aka Prastora працягвае рэфлексаваць беларускую рэчаіснасць і сябе праз прызму музыкі. У сваіх новых трэках — «Голы» і «Сакрэты з-пад коўдры» — артыст настальгуе па «страчаным раі» і, як заўжды, любуецца прыгажосцю моманту. 

Такая музыка будзе блізкая для тых, хто, як і Улад, вучыцца прымаць сябе і дазваляць сабе радасць, шукае адказы ў любові і шчырасці, а таксама спрабуе асэнсаваць месца беларусаў і беларусак у бязмежнай зорнай сістэме. 

«Кожны чалавек — партал у вечнасць», — перакананы музыка. Яго творчасць глыбока гуманістычная, у ёй гучыць моцны антываенны мэсэдж. А філасофскую лірыку падмацоўвае гіпнатычная музыка, якая ўводзіць слухача ў псіхадэлічны транс.

Улад Рубанаў — журналіст, дызайнер, калажыст, рэжысёр і музыка. Працаваў з выданнямі «Новы Час», KYKY, «Еўрарадыё». У 2021-м быў вымушаны з’ехаць з Беларусі, пачатак поўнамаштабнага ўварвання сустрэў у Кіеве, пасля пераехаў у Варшаву, дзе цяпер жыве з жонкай і коткай, пра якіх часта і з любоўю спявае ў сваіх трэках. З пачатку года ў Prastora выйшла чатыры рэлізы: адзін EP, адзін лонгплэй і два сінглы.