Польшча падоўжыла забарону на чыгуначныя зносіны з Беларуссю да 30 красавіка

Забарона на чыгуначныя зносіны на польска-беларускай мяжы падоўжана да 30 красавіка. Пра гэта паведамляе Дзяржаўны пагранічны камітэт Беларусі са спасылкай на польскія СМІ.

Паводле інфармацыі польскіх выданняў, урад Польшчы падоўжыў дзеянне пастановы, якая абмяжоўвае чыгуначныя зносіны на мяжы з Беларуссю, да 30.04.2023, адзначае «Эканамічная газета».

У Дзяржпагранкамітэце адзначылі, што раней забарона была звязана з пандэміяй COVID-19 і ўступіла ў сілу яшчэ ў сакавіку 2020 года.

Наконт прычын для цяперашняга падаўжэння абмежаванняў на чыгуначныя перавозкі, а таксама пра перспектывы іх зняцця не паведамляецца.

У ДПК таксама нагадалі, што па ініцыятыве польскіх улад былі закрыты ўсе аўтадарожныя пункты пропуску, якія мяжуюць з Гродзенскай вобласцю. Апошні з іх — «Баброўнікі» (з беларускага боку — «Бераставіца») — прыпыніў працу 10 лютага 2023 года пасля прысуду Андрэю Пачобуту. У якасці прычыны для яго закрыцця ўлады Польшчы назвалі забеспячэнне грамадскай бяспекі.

На мяжы з Брэсцкай вобласцю цяпер функцыянуюць два аўтадарожныя пункты пропуску — «Кукурыкі» (для грузавога транспарту) і «Цярэспаль» (для легкавога транспарту).

Пры гэтым польскі бок з 21 лютага ў пункце пропуску «Кукурыкі» абмежаваў рух грузавога транспарту. Выключэнне робяць для фур, зарэгістраваных у дзяржавах-чальцах ЕС, Еўрапейскай асацыяцыі свабоднага гандлю (ЕАСГ). Грузавыя аўто, не зарэгістраваныя ў пералічаных вышэй арганізацыях і краінах, не могуць перасякаць польска-беларускую мяжу.

У сувязі з гэтым самым загружаным напрамкам на ўезд у ЕС на цяперашні момант з'яўляецца літоўскі.