Улады Італіі арыштавалі нерухомасць расійскага прапагандыста Салаўёва на возеры Кома

Тое ж самае адбылося і з бізнесоўцам Алішэрам Усманавым.

У Італіі арыштавалі нерухомасць расійскага бізнесоўца Алішэра Усманава і тэлевядучага Уладзіміра Салаўёва, якія трапілі ў санкцыйныя спісы ЕС, паведамляе La Republica.

Па даных газеты, гаворка ідзе аб двух вілах Салаўёва на возеры Кома, а таксама аб віле Усманава на Сардзініі.

Раней гэта ж выданне паведаміла аб канфіскацыі яхт расійскіх бізнесменаў Аляксея Мардашова і Генадзя Цімчанкі ў Італіі. Акрамя таго, у Таскане канфіскаваная віла экс-дэпутата Дзярждумы Алега Саўчанкі.

3 сакавіка кіраўнік Мінфіна Францыі Бруно Ле Мэр заявіў, што французская мытня зрабіла канфіскацыю яхты Amore Vero ў горадзе Ла-Сьёта. Судна належыць, паводле звестак Ле Мэра, кампаніі, асноўным акцыянерам якой, нібыта, з'яўляецца Ігар Сечын.

Акрамя таго, Forbes паведамляў, што ў расійскага мільярдэра Алішэра Усманава нямецкія ўлады канфіскавалі яхту коштам каля 600 мільёнаў даляраў.