Выйшла на волю палітзняволеная Вольга Дубовік, трэцяя асуджаная па «справе цюкоў»

На волю выйшла 45-гадовая  фігурантка «справы размаляваных цюкоў з саломай» Вольга Дубовік. Днямі вызваліліся іншыя асуджаныя па гэтыя справе — палітвязні Ігар Мыслівец і Алена Дзядзюля. Усе яны адбылі свае тэрміны, паведамляюць праваабаронцы.

Нагадаем, суддзя Вікторыя Суднік 31 студзеня прызнала фігурантаў рэзананснай «справы размаляваных цюкоў з саломай» вінаватымі па ч. 2 арт. 339 КК (хуліганства групай асобаў) і прызначыла ўсім, акрамя Кацярыны Арыка, год калоніі ва ўмовах агульнага рэжыму — Андрэю Арыку, Максіму Дубешку, Аляксандру Бабко, Вользе Дубовік, Алене Дзядзюлі, Ігару Мысліўцу.

Кацярыну Арыку асудзілі да 1,5 года «хатняй хіміі» і вызвалілі ў залі суда.

На судзе стала вядома, што на поле сілавікі прыехалі з аўтаматамі, супрацоўнікі на затрыманых малявалі свастыку, некаторых збівалі.