Тата не дома — тата за кратамі. Гісторыі шматдзетных бацькаў, якіх рэжым трымае ў палоне
У Дзень бацькі далёка не ўсе дзеткі маюць магчымасць павіншаваць сваіх татаў са святам. У некаторых дзяцей любімага бацьку забраў рэжым.
Сёння ў Беларусі адзначаецца Дзень бацькі. У гэты час у зняволенні па ўсёй краіне ўтрымліваюцца амаль 30 палітзняволеных шматдзетных татаў. Пакуль яны чакаюць следства і адбываюць тэрміны паводле палітычных матываў, іх дзеці растуць без бацькоў: часта маці вымушаныя эміграваць з імі, каб унікнуць палітычнага пераследу. «Вясна» расказвае некалькі гісторый такіх сямей.
Уладзь Лабковіч, праваабаронца, бацька траіх дзетак
Уладзімір Лабковіч — юрыст «Вясны», каардынатар кампаніі «Праваабаронцы за свабодныя выбары». Далучыўся да працы праваабарончага цэнтра ў 1998 годзе як валанцёр, пасля прэзідэнцкіх выбараў у 2001-м стаў паўнавартасным сябрам «Вясны». За час зняволення ва Уладзя значна пагоршылася здароўе. Ён скардзіцца на частыя галаўныя болі і на бяссонне.
Ва Уладзя і яго жонкі Ніны трое дзяцей: старэйшая дзяўчынка Адэля, а таксама двое хлопчыкаў-блізнюкоў — Адам і Ян. Уладзь пісаў дзецям казку ў якасці падарунка на Дзень народзінаў. Ніна Лабковіч расказвала, якія кранальныя лісты Уладзь піша дачцы — «яго прынцэсе».
Андрэй Любецкі, лекар, бацька чатырох дзяцей
Андрэй Любецкі — лекар, 18 гадоў адпрацаваў у дзіцячай лякарні №4 у Мінску сківічным хірургам. Быў валанцёрам каля ізалятара на Акрэсціна. Мае чатырох дзяцей. Старэйшай дачцэ 13 гадоў, двайнятам (хлопчыку і дзяўчынцы) — па 10, малодшай дачцэ — 7. Усе займаюцца таэквандо.
Жонка Андрэя Наталля Любецкая была вымушана разам з дзецьмі з'ехаць з краіны. Яна фігуравала ў «расследаванні» беларускага дзяржканала: жанчыну абвінавацілі ў перадачы падстаўных «сакрэтных дакументаў» экс-алмазаўцу Ігару Макару. Мужчыну асудзілі да пяці гадоў пазбаўлення волі.
Зміцер Дашкевіч, актывіст, вернік, бацька чацвярых дзетак
Зміцер Дашкевіч — актывіст, былы старшыня «Маладога фронту». Удзельнічае ў грамадска-палітычным жыцці з 2001 года, апошнія гады шмат часу прысвячаў абароне Курапатаў. Суддзя Таццяна Пірожнікава прызнала палітвязня і яго жонку, якая нядаўна нарадзіла чацвёртае дзіця, вінаватымі і прызначыла Змітру паўтара года калоніі, а Насце — тры гады «хатняй хіміі». У сям'і Дашкевічаў нарадзілася дзіця, калі Зміцер ужо тры месяцы ўтрымліваўся ў СІЗА.
Глядзіце таксама
«Сёння ў 6.50 раніцы ў нас нарадзіўся сын. Поўнае імя яго будзе — Данііл. Як хацеў тата. А скарочанае — Ніл. Як хацела мама. Малыш крыху паспяшаўся з’явіцца на свет і зараз ім нейкі час будуць апекавацца дактары. А я прыходжу ў сябе пасля аперацыі. Але ўсе жывы і здаровы, то слава Богу!» — напісала Наста.
Гэта чацвёртае дзіця ў сям'і: у Дашкевічаў яшчэ дзве дачкі Мара і Магдалена і сын Давід. Пасля Змітра судзілі яшчэ некалькі разоў, у выніку яго тэрмін склаў тры гады і дзевяць месяцаў калоніі.
Мікалай Рой — інжынер, бацька чатырох дзетак
Мікалай Рой скончыў БДУІР, інжынер-сістэматэхнік. Доўгі час працаваў у РУП «Белтэлекам» па спецыяльнасці. Мае чатырох дзяцей, апошнім часам пражываў у Брэсце. Яго асудзілі паводле «справы Гайдукевіча» да 12 гадоў калоніі.
Глядзіце таксама
Сяргей Волкаў — актор, бацька траіх дзетак
Сяргей Волкаў — актор Палесскага драмтэатра, валанцёр. Яго ведаюць у Пінску як арганізатара культурніцкіх мерапрыемстваў і валанцёра гарадской бальніцы; ён выхоўвае дзіця з інваліднасцю (ДЦП) — сына Віктара. Агулам у яго трое дзетак. Сяргею прад'явілі абвінавачанне па справе аб «масавых беспарадках» (ч.2 арт.293 Крымінальнага кодэкса), узбуджанай па падзеях у Пінску ў ноч пасля выбараў 9 жніўня, і асудзілі да чатырох гадоў зняволення. Пакуль бацька быў яшчэ ў СІЗА, сыну патрабавалася лячэнне (рэабілітацыя, санаторыі, падтрымліваючая тэрапія), яны выплочвалі крэдыт. Малодшы Міраслаў вучыцца ў школе. Тата быў ідэйным натхняльнікам для сыноў, не гаворачы пра тое, што вельмі дапамагаў Віктару перасоўвацца, купацца і гэтак далей.