У ААН прапанавалі абмежаваць права вета пастаянных чальцоў Савета бяспекі
Вярхоўны камісар ААН па правах чалавека выступіў з ініцыятывай абмежаваць права вета пастаянных чальцоў Савета бяспекі. Расія негатыўна паставілася да гэтай прапановы.
Расія накладвае вета на рэзалюцыю Савета бяспекі ААН па MH17. Фота з архіву www.dw.com
Вярхоўны камісар Арганізацыі Аб'яднаных Нацый па правах чалавека Зейд Раад аль Хусейн заклікаў Савет бяспекі ААН абмежаваць права вета краін — пастаянных чальцоў гэтай арганізацыі, якое дазваляе ім блакаваць любую рэзалюцыю ААН. Пастаяннымі чальцамі Савета бяспекі з'яўляюцца Расія, Кітай, ЗША, Вялікабрытанія і Францыя, паведамляе www.dw.com
Сёння, 4 кастрычніка, Зейд Раад аль Хусейн падчас выступу ў Жэневе заявіў, што такі крок дазволіць перадаваць справы аб ваенных злачынствах у Сірыі ў Міжнародны крымінальны суд.
"Я цвёрда веру, што надышоў час для моцнага кіраўніцтва і смелых дзеянняў, а таксама што Савет Бяспекі ААН павінен без якіх-небудзь далейшых затрымак зацвердзіць крытэрыі, якія стрымліваюць чальцоў ад выкарыстання права вета ў тых выпадках, калі існуюць сур'ёзныя апасенні, што, магчыма, былі здзейснены ваенныя злачынствы, злачынствы супраць чалавечнасці або генацыд", — гаворыцца ў заяве Вярхоўнага камісара ААН па правах чалавека.
На думку Раад аль Хусейна, перадача спраў аб ваенных злачынствах у Сірыі "стала б больш чым апраўданай, улічваючы нястрымную і глыбока шакавальную беспакаранасць, якая характарызуе гэты канфлікт, і маштабы ўчыненых злачынстваў, некаторыя з якіх могуць сапраўды складаць ваенныя злачынствы і злачынствы супраць чалавечнасці".
Прэс-сакратар прэзідэнта Расіі Дзмітрый Пяскоў заявіў, што Крэмль не падтрымлівае прапанову аб абмежаванні права вета пастаянных чальцоў Савета бяспекі ААН і адзначыў, што ў Крамлі да гэтай ініцыятывы "ставяцца негатыўна".