МУС Літвы: Улады Вільнюса дарэмна сеюць паніку сярод жыхароў з нагоды БелАЭС

Міністр унутраных спраў Літвы Эймуціс Місюнас заявіў, што ўлады Вільнюса, якія плануюць вучэнні па эвакуацыі жыхароў горада ў сувязі з верагоднай аварыяй на Беларускай АЭС у Астраўцы, дарма сеюць паніку.


"Яны хутчэй, здаецца, палохаюць жыхароў горада Вільнюса, сеюць паніку, хоць па сутнасці няма нават тэарэтычнай падставы гэта рабіць", — сказаў Місюнас у чацвер BNS.
Мэрыя Вільнюса паведаміла, што правядзе вучэнні з імітацыяй аварыі на БелАЭС і эвакуацыяй часткі жыхароў 5 верасня. Падчас вучэнняў будзе зроблена спроба ацаніць гатоўнасць групы муніцыпальных прадпрыемстваў, іншых службаў да адпаведных пагрозаў, будуць імітавацца і кібератакі.
Па словах Місюнаса, Вільня не трапляе ў прадугледжаную ў планах 30-кіламетровую зону вакол станцыі, з якой у выпадку аварыі будуць эвакуявацца жыхары. Паводле яго, Вільнюс знаходзіцца ў так званай 100-метровай зоне, дзе для выратавання жыхароў прадугледжаны іншыя дзеянні. "Не магу ніяк апраўдаць недахоп кампетэнтнасці (...) Ці яны план не чыталі, ці ёсць нейкія іншыя прычыны, цяжка сказаць", — адзначыў міністр. Палітык сказаў, што запланаваныя мэрыяй вучэнні не ўзгадняліся ні з МУС, ні з паліцыяй, ні з пажарна-выратавальнай службай. Паводле яго слоў, Дэпартамент супрацьпажарнай аховы і выратавання ў пачатку кастрычніка правядзе вучэнні па абароне насельніцтва ў выпадку аварыі на атамнай станцыі. "Гэта будуць нармальныя вучэнні, з усімі органамі мясцовага самакіравання, якія трапляюць у гэтую сітуацыю. Зараз мы якраз рассылаем заявы ў органы мясцовага самакіравання, узгоднім сцэнары", — сказаў Э. Місюнас.
Дырэктар адміністрацыі Віленскага самакіравання Павілас Падзярскіс сказаў, што праводзіць вучэнні таму, што цэнтральныя ўлады млява рыхтуюцца да ўводу БелАЭС у эксплуатацыю і да верагодных інцыдэнтаў. Паводле яго слоў, у горшым выпадку з Вільнюса прыйдзецца эвакуіраваць каля 50 тыс. жыхароў.
БелАЭС будуецца ў Астраўцы, прыкладна ў 50 км ад Вільні і менш чым у 30 км ад мяжы Літвы. Увод у эксплуатацыю першага рэактара станцыі намечаны на восень гэтага года. Літоўскі ўрад кажа, што пры будаўніцтве БелАЭС не выконваюцца патрабаванні да бяспекі і аховы прыроды. Беларусь такія прэтэнзіі катэгарычна адхіляе.
Паводле delfi.lt