ЕНП здолее ўтрымаць лідарства ў Еўрапарламенце, але правыя партыі дамагліся поспеху
Паводле папярэдніх разлікаў Еўрапарламента, найбуйнейшай фракцыяй у новай кадэнцыі стане Еўрапейская народная партыя. Яна атрымае 184 месцы. У той жа час правыя партыі могуць упершыню пераадолець планку ў 30% мандатаў.
Фота з news.myseldon.com
Еўрапейская народная партыя (ЕНП) — правацэнтрысцкая агульнаеўрапейская палітычная партыя, заснаваная ў 1976 годзе. ЕНП ўключае ў сябе хрысціянска-дэмакратычныя і ліберальна-кансерватыўныя партыі краін Еўропы. Партыя ўключае ў сябе 49 калектыўных членаў, нацыянальныя партыі з 27 краін. Маецца асацыяванае сяброўства — 6 партый з 5 краін. Назіральнікамі пры партыі з'яўляюцца 25 партый з 10 краін.
Другой па колькасці дэпутатаў сілай Еўрапарламента застануцца сацыял-дэмакраты, якія атрымліваюць 139 месцаў у Еўрапарламенце. Лібэральная «Абновім Еўропу» атрымлівае 80 мандатаў, «Зялёныя» — 52 мандаты, левыя — 36 мандатаў. Права-кансерватыўнае аб'яднанне ECR атрымлівае 73 месцы ў Еўрапарламенце, ультраправыя з «Ідэнтычнасці і дэмакратыі» — 58 месцаў. Яшчэ 45 месцаў атрымалі партыі, якія не ўваходзяць ні ў адзін з блокаў.
Пры гэтым скрайне правыя партыі дамагліся поспеху ў параўнанні з папярэднімі выбарамі. Паводле даных экзітполаў, нямецкая «Альтэрнатыва для Германіі» набірае больш за 16% замест меркаваных 11%. У Аўстрыі першай у рэйтынгах стала Партыя свабоды (27% замест 17%).
Глядзіце таксама
У Францыі рэкордных вынікаў дасягнула вельмі правая партыя Марын Ле Пен «Нацыянальнае аб'яднанне» (31,5% замест 23,3%). Такі поспех прывёў да таго, што прэзідэнт Францыі Эмануэль Макрон у нядзелю, 9 чэрвеня, абвясціў аб роспуску Нацыянальнай асамблеі (ніжняй палаты парламента).
У выніку чакаецца, што ЕНП і яе партнёры па дзеючай кааліцыі (лібералы, сацыял-дэмакраты і зялёныя) захаваюць большасць у Еўрапарламенце, што, хутчэй за ўсё, забяспечыць старшыні Еўракамісіі Урсуле фон дэр Ляен яшчэ адзін тэрмін на пасадзе.
У той жа час правыя партыі могуць упершыню пераадолець планку ў 30% мандатаў, што дазволіць ім блакаваць прыняцце некаторых рашэнняў.
Паводле BBC, DW, Reform.news
Глядзіце таксама
