Рашэнне па Макею могуць перагледзець
Гэта адбудзецца, калі мэта прыпынення дзеяння санкцый не будзе дасягнутая.
Візавыя санкцыі Еўрапейскага саюза ў дачыненні да Уладзіміра Макея прыпыненыя толькі на той час, пакуль ён займае пасаду міністра замежных спраў Беларусі. Пра гэта гаворыцца ў рашэнні Рады ЕС, якое было апублікавана 25 чэрвеня ў Афіцыйным часопісе Еўразвяза.
У дакуменце, тэкст якога прыводзіць выданне, гаворыцца, што гэта рашэнне можа быць перагледжана, калі Рада ЕС палічыць, што мэты, дзеля якіх яно было прынята, не дасягнутыя.
Нагадаем, учора міністра замежных спраў Беларусі часова выключылі са спісу асоб, якім забаронены ўезд на тэрыторыю Еўрасаюза. Такое рашэнне было прынята на пасяджэнні Рады міністраў замежных спраў ЕС у Люксембургу «ў мэтах палягчэння дыпламатычных кантактаў». Пры гэтым, падкрэсліваецца, што Макей застаецца ў спісе асоб, на якіх распаўсюджваюцца астатнія абмежавальныя меры.
Кіраўнік беларускага МЗС, якога некаторыя прадстаўляюць ледзь не як галоўнага «ліберала» сярод беларускіх чыноўнікаў, — выхадзец са спецслужбаў і адыграў адну з галоўных роляў як у правакацыі 19 снежня 2010 года, так і ў наступных. Калі перад выбарамі 2006 года беларусаў, якія пратэставалі супраць фальсіфікацый, палохаў асабіста старшыня КДБ Сцяпан Сухарэнка, то ў 2010 годзе ўдзельнікаў Плошчы запалохваў тэрактамі сам кіраўнік адміністрацыі Лукашэнкі Макей.