Былы намміністра абароны Беларусі асуджаны літоўскім судом на 14 гадоў

У сераду Віленскі акруговы суд абвясціў прысуд па справе аб штурме Віленскага тэлецэнтра 13 студзеня 1991 года. Былы намеснік міністра абароны Беларусі генерал Уладзімір Усхопчык прысуджаны завочна да 14 гадоў турмы.

Як паведамляе Delfi, яго прызналі датычным да гібелі людзей падчас штурму тэлецэнтра. Усхопчык узначальваў тады Віленскі гарнізон, а пасля гэтага быў пераведзены на службу ў Беларусь.
Генпракуратура Літвы патрабавала для Усхопчыка пажыццёвага зняволення. Суд прысудзіў генерала завочна да 14 гадоў турмы.
Літоўскі бок некалькі разоў звярталася да Беларусі з просьбай аб выдачы былога начальніка Віленскага гарнізона, аднак яму было адмоўлена. Дамовіліся толькі аб допыце.
«Па нашай Канстытуцыі грамадзяне Рэспублікі Беларусь не могуць быць выдадзены замежнай дзяржаве», — заявіў у 2010 годзе Рыгор Васілевіч, які займаў тады пасаду генеральнага пракурора.
У 2018 годзе ў інтэрв'ю расійскаму выданню «Взгляд» Усхопчык заявіў, што ўспрыняў патрабаванне аб пажыццёвым тэрміне для сябе спакойна.
— Шчыра кажучы, гэта было для мяне некалькі нечакана, але ўспрыняў я гэта спакойна. Я разумею, што тая праўда, якая на нашым баку, застаецца праўдай. А тое, што яны робяць ... Ну хай сабе робяць, няхай выдумляюць нешта. Я ў Літву не ездзіў і не збіраюся гэтага рабіць. За тое, што мы, ваенныя, тады ўсё спакойна зрабілі, без усякай стральбы, нас узнагародзіць трэба. Бо магло быць, як у Чачні, у Афганістане. Мы памяркоўныя, нармальныя людзі, «бледнатварыя», у такім вось выпадку.
Сёння таксама прысуд абвешчаны ў дачыненні да 67 грамадзян Расіі, Беларусі і Украіны: яны атрымалі тэрміны ад 4 да 14 гадоў. Сярод асуджаных — былы міністр абароны СССР Дзмітрый Язаў (10 гадоў пазбаўлення волі), былы афіцэр КДБ Міхаіл Галаватаў (12 гадоў). Большасць фігурантаў справы, як і Усхопчык, асуджаныя завочна, таму што Расія і Беларусь адмовіліся іх выдаваць.
Перад судом паўсталі толькі два савецкіх афіцэра, гэта грамадзяне РФ — затрыманы ў Літве ў 2014 годзе афіцэр Юры Мель і Генадзь Іваноў, што жыве ў Вільнюсе. Мель прысуджаны да сямі гадоў пазбаўлення волі. Іваноў асуджаны на чатыры гады.
Прысуд можа быць абскарджаны ў апеляцыйным судзе Літвы.
Пры захопе савецкімі вайсковымі часткамі і спецпадраздзяленнямі Віленскай тэлевежы і будынку Літоўскага радыё і ТБ у ноч на 13 студзеня 1991 года загінулі 14 чалавек, больш за тысячу пацярпелі.
tut.by