"Апошні золак" — супраць смяротнага пакарання (фота)

Супольны музычны праект “Апошні золак”, прысвечаны тэме смяротнага пакарання, прэзентавалі беларускія музыкі. Дзея адбывалася на сцэне ў суправаджэнні візуаліцый з пяску мастачкі Насты Шастак. Усё наўпрост транслявалася ў інтэрнэце на шэрагу сайтаў.



Рэжысёр-пастаноўшчык праекту Павел Бандзіч кажа, што задаволены вынікамі працы:

— Самае галоўнае, што я хацеў зрабіць — гэта праз жывое расказваць пра смерць. Гэта вельмі цяжка — расказваць пра смерць. І таму я вырашыў, што ў мяне ў канцэрце будзе ўсё жывое — жывы мастак, жывыя выканаўцы, жывы гук — і анлайн-трансляцыя павінна быць жывая. Усё атрымалася, мне здаецца.

У праекце прынялі ўдзел Зміцер Вайцюшкевіч, Аляксандр Памідораў, Лявон Вольскі, Наста Шпакоўская, Віктар Рудэнка, Алесь Дзянісаў ды Ганна Хітрык. Як кажа апошняя, найперш да ўдзелу падштурхнула сама тэма:

— Я перш за ўсё дазналася аб праекце, як аб сардэчным праекце, аб чалавечным праекце. А потым ужо задавала пытанні наконт музыкаў, тусоўкі, ці чагосьці яшчэ. Мне здаецца, тут адмовіцца ніяк не было магчымасці, таму што я чалавек, таму што ў мяне ёсць сэрца.

10-га кастрычніка, у Сусветны дзень барацьбы супраць смяротнага пакарання, на хвалях Беларускага Радыё Рацыя адбудзецца рэтрансляцыя канцэрту.

Праект “Апошні золак” арганізаваны пры падтрымцы праваабарончага цэнтру “Вясна”.

Яна Запольская, Беларускае Радыё Рацыя