Разгляд скаргі абаронцаў Курапатаў працягнецца

21 жніўня а 15.00 калегія па грамадзянскіх справах Мінскага гарадскога суда падоўжыць разгляд касацыйнай скаргі на рашэнне суддзі суда Цэнтральнага раёна горада Мінска. Суддзя Іван Майсейчык 27 чэрвеня не задаволіў скаргу грамадзянаў на Генеральную пракуратуру.



абаронцы Курапатаў перад пачаткам пасяджэння ў Мінскім гарадскім судзе

Такое рашэнне прыняла 7 жніўня судовая калегія па грамадзянскіх справах Мінгарсуду пад старшынствам Іны Яблакавай.  

Сваю пазіцыю судовая калегія матывавала неабходнасцю выслухаць прадстаўнікоў Мінскага аблвыканкама і Міністэрства культуры. 

Прадстаўнікі грамадскасці прасілі суд першай інстанцыі абавязаць Генеральную пракуратуру прадпрыняць дзеянні для выпраўлення парушэнняў заканадаўства аб ахове Курапатаў з боку СТАА “БелРэстІнвест”, а таксама для вынасу 4 дамкоў аб’екту прыдарожнага сервісу з першапачатковай назваю “Бульбаш-хол” з тэрыторыі ахоўнай зоны нерухомай матэрыяльнай гісторыка-культурнай каштоўнасці. Такім чынам павінна быць выканана прадстаўленне Генеральнай пракуратуры Мінскаму аблвыканкаму ад 27 лістапада 2012 году.

Рашэнне суду Іван Майсейчік матываваў, між іншым, тым, што Генеральная пракуратура лічыць свае прадстаўленне Мінаблвыканкаму ад 27 лістапада 2012 году “дзеючым”. Паводле словаў суддзі, прадстаўленне Генпракуратуры дагэтуль знаходзіцца ў працэсе выканання, паколькі не толькі прыпынены будаўнічыя работы на аб’екце прыдарожнага сервісу, але і вырашаюцца пытанні аб самавольным будаўніцтве з боку “БелРэстІнвесту”. Прычым, вынас 4 дамкоў з ахоўнай зоны Курапатаў будзе вырашацца паводле артыкулу 223 Грамадзянскага кодэксу Рэспублікі Беларусь (“Самовольная постройка и её последствия”), сказаў суддзя.

Заяўнікі лічаць такое рашэнне суддзі Івана Майсейчыка незаконным, неабгрунтаваным і падлягаючым адмене, просяць накіраваць справу ў той жа суд на новы разгляд па сутнасці.

Сярод заяўнікаў скаргі — старшыня ГА “Хрысціянская злучнасць “Курапаты” 85-гадовы Вацлаў Нямковіч, старшыня Беларускай асацыяцыі ахвяраў палітычных рэпрэсій Зінаіда Тарасевіч, грамадскія дзеячы і навукоўцы Вацлаў Арэшка і Вінцук Вячорка, а таксама грамадскі актывіст Алесь Макаў, які восенню 2008 году затрымаў у Курапатах вандалаў, за што пазней страціў працу. Юрыдычнае суправаджэнне па справе забяспечвае вядомы беларускі праваабаронца Гары Паганяйла. 

Прадстаўнікі грамадскасці разглядаюць дзеянні Івана Майсейчыка як адмову заяўнікам у правасуддзі, а  вынікі суду — не як сваю паразу, а як першы крок да перамогі ў абароне Курапатаў ад чыноўніцтва і забудоўшчыкаў, нягледзячы на тое, што суддзя адмовіўся задаволіць скаргу грамадскасці.

Падчас пасяджэння ў Мінгарсудзе заяўнікі звярнулі ўвагу на беспакаранасць дзеянняў чыноўніцтва. Так, згодна прадстаўленню Гепракуратуры, трэба было прыцягнуць да дысцыплінарнай адказнасці галоўнага архітэктара Мінскай вобласці Аляксандра Валовіча, начальніка ўпраўлення культуры Мінабвыканкаму Анатоля Акушэвіча, начальніка аддзела архітэктуры і будаўніцтва Мінскага райвыканкаму Валянціна Драздова і начальніка аддзела культуры Мінрайвыканкаму Сяргея Кудзіна. Аднак  у Мінаблвыканкаме чамусьці заявілі аб немажлівасці прыцягнення да адказнасці з-за звальнення начальніка ўпраўлення архітэктуры і горадабудаўніцтва Уладзіміра Крэсц’янчыка, які ўзгадніў генплан будаўніцтва аб’екту.

Прадстаўнікі грамадскасці падкрэслілі, што з заходняга боку Курапатаў “БелРэстІнвест” самавольна і незаконна забудаваў каля паловы плошчы ахоўнай зоны шырынёй 120 метраў — на глыбіню ад 44,85 м да 64,53 м. Згодна прадпісанню Генпракуратуры, трэба было цягам месяца — да 27 снежня 2012 года — вырашыць лёс пабудоў (чатыры дамкі модульнага тыпу, частка будынку рэстарану і дзіцячая пляцоўку), самавольна і незаконна ўзведзеных у ахоўнай зоне Курапатаў. Аднак і да сёння гэта не зроблена.

Трэба мець на ўвазе, што пракуратура Цэнтральнага раёна сталіцы накіравала ў Мінгарсуд свой касацыйны пратэст з просьбай адмяніць рашэнне суддзі Івана Майсейчыка і спыніць вытворчасць па гэтай справе.  

Са свайго баку заяўнікі просяць Мінскі гарадскі суд адхіліць гэты пратэст пракуратуры.

Неабходна выказаць падзяку журналістам недзяржаўных СМІ, якія асвятляюць судовую справу, а таксама зарэгістраванай у Літве Асамблеі недзяржаўных дэмакратычных арганізацый Беларусі — за інфармацыйную падтрымку заяўнікаў у межах кампаніі “Зробім лепш”.