Тэсты на COVID-19 будуць рабіць дзецям — кантактам другога ўзроўню

Чытачы даслалі ў рэдакцыю TUT.BY новы загад Міністэрства аховы здароўя ад 5 чэрвеня № 615 «Аб аказанні медыцынскай дапамогі пацыентам з інфекцыяй COVID-19». Ён мяняе папярэдні загад ад 21 траўня.

У новым дакуменце сказана, што да 15 чэрвеня начальнікам упраўленняў па ахове здароўя аблвыканкамаў і Мінгарвыканкама трэба распрацаваць паэтапныя планы вяртання арганізацый аховы здароўя ў рэжым звычайнага функцыянавання. Пры гэтым, праўда, павінны быць прадугледжаны магчымасці арганізаваць аддзяленне або яго частку, якое будзе працаваць у рэжыме інфекцыйнага стацыянара (з падзелам на чыстыя і брудныя зоны), або баксіраваныя палаты.
У загадзе падрабязна апісана, што такое бессімптомная, лёгкая, сярэднецяжкая і цяжкая формы COVID-19. Як гаворыцца ў дакуменце, фактары, якія абцяжарваюць цячэнне пнеўманіі ў пацыентаў з інфекцыяй COVID-19: узрост старэйшы 55, атлусценне, калі індэкс масы цела больш за 40, цукровы дыябет, хранічная кардыяваскулярная паталогія з сардэчнай недастатковасцю, хранічная паталогія лёгкіх (напрыклад, астма, ХОБЛ ), рак, ВІЧ і інш.
Па загадзе, абавязкова шпіталізаваць павінны: пацыентаў з пнеўманіяй і COVID-19 або падазрэннем на COVID-19, пацыентаў з вострым рэспіраторным дыстрэс-сіндромам і з інфекцыяй COVID-19.
Дыягназ COVID-19 на новы загад ставіцца:
- па аднаразоваму станоўчага тэсту ПЦР;
- пры тыповай рэнтгеналагічнай сімптаматыцы (па даных КТ) і клінічнай карціне з наступным станоўчым тэстам;
- пры двух станоўчых тэстах сералагічнай дыягностыкі (у тым ліку экспрэс-тэстах на антыцелы) з інтэрвалам не менш за суткі і тыповай клінічнай карціне для COVID-19.
Тэсты на COVID будуць рабіць кантактам першага ўзроўню — на 3-5-е суткі з моманту кантакту і паўторна на 10-12-я суткі (калі гэта даследаванне ПЦР) ці на 13-е (калі экспрэс-тэст). Таксама тэсты па дакуменце пачынаюць рабіць і кантактам другога ўзроўню, калі гэта дзеці ва ўзросце да 10 гадоў.
У новым загадзе захавалася правіла, што пры бессімптомнай або лёгкай формах хваробы бальнічны будуць закрываць на 21-ы дзень нават без адмоўнага тэсту. «На падставе адсутнасці небяспекі распаўсюджвання інфекцыі ў пацыентаў з бессімптомнай і лёгкай формамі цячэння інфекцыі COVID-19 звыш 14-21 дня ад моманту кантакту, закрыццё лістка непрацаздольнасці на 21-ы дзень ад моманту кантакту (па выніках экспрэс-тэсту на 14-е суткі ад момантукантакту IgМ <+>) з'яўляецца абгрунтаваным», сказана ў дакуменце.