«На здароўе не скардзіўся». Як адчуваў сябе Віктар Бабарыка апошнім часам

Увечары 26 красавіка з'явілася інфармацыя, што палітвязень Віктар Бабарыка знаходзіцца ў наваполацкім шпіталі. Сёння стала вядома, што яго стан здавальняючы. Але няма звестак ні пра тое, што здарылася, ні пра дыягназ палітыка. Якімі былі ўмовы ўтрымання і як ён адчуваў сябе апошнім часам? «Л*стэрка» спытала пра гэта ў члена штаба Бабарыкі Івана Краўцова.

Як адзначае Краўцоў, у наваполацкай калоніі №1, дзе адбывае пакаранне Віктар Бабарыка, самыя цяжкія ўмовы ўтрымання, на палітвязняў даволі моцна ціснуць.

— Апошнім часам, асабліва пасля Новага года ці крыху пазней, пачалося ўзмацненне прэсінгу практычна на ўсіх даволі публічных палітвязняў, — апісвае сітуацыю прадстаўнік штаба. — Людзей пераводзяць у ШІЗА, ПКТ, і Віктар Бабарыка тут не выключэнне. Ёсць падазрэнне, што апошнім часам ён быў у ШІЗА практычна без перапынку. А падставу для гэтага можна прыдумаць заўсёды, дастаткова любога дробнага парушэння.

Акрамя гэтага, палітвязня істотна абмяжоўваюць у зносінах. Так, яшчэ паўгода таму ў яго пачаліся складанасці з перапіскай.

— Апошнія два-два з паловай месяцы наогул не было ніводнай вестачкі. Гэта таксама можа казаць пра тое, што ён знаходзіцца ў ШІЗА, — лічыць Краўцоў. — Што тычыцца адваката, то 20 сакавіка быў рэйд па абаронцах палітвязняў, у тым ліку гэта закранула адваката Віктара Бабарыкі. І цяпер ён не можа працягваць працу.

Таксама вядома, што іншым зняволеным забараняюць мець зносіны з былым банкірам, ствараючы яму абсалютную ізаляцыю. У адказ на пытанне, як такі падыход адміністрацыі калоніі можа паўплываць на самога Бабарыку, суразмоўца ўдакладняе:

— Зыходзячы з майго разумення Віктара Дзмітрыевіча, я думаю, ён досыць цэласны і самастойны чалавек. Ён добра разумее сітуацыю і не хоча падстаўляць іншых людзей.

Цэнтрыст з чырвонымі шлейкамі. У чым феномен палітыка Віктара Бабарыкі

Паводле звестак штаба, маральны стан палітвязня апошнім часам быў нармальным. Як і стан здароўя — скаргаў ад яго не было.

— Прынамсі, да ўчорашняга дня, калі з'явілася вось гэтая інфармацыя [аб шпіталізацыі], — удакладняе Краўцоў. — Тут яшчэ важна тое, што ён працуе качагарам, і гэта праблемы бруднага паветра, вугальнага пылу. Усё гэта можа выклікаць абвастрэнне рэспіраторных захворванняў, алергічныя рэакцыі, можа вельмі моцна аслабляць імунітэт. І калі чалавек працуе качагарам даволі доўгі час, праблемы са здароўем яму практычна гарантаваныя.

Апісваючы ўзмацненне жорсткасці ўмоў для Віктара Бабарыкі і іншых зняволеных гэтай калоніі, Іван Краўцоў адзначае: у штабе пакуль не да канца разумеюць, з чым гэта звязана і чаму ўжо асуджаным не могуць даць магчымасць адбываць свой тэрмін у прымальных умовах.

— Што тычыцца ўчорашняй сітуацыі — гэта сапраўды нешта выключнае. З'яўляецца даволі жорсткая інфармацыя аб выяўленай вадкасці ў лёгкіх і тым, што ён быў збіты. Мы не можам гэта пацвердзіць (размова адбылася да атрымання штабам звестак, што палітыку адпампоўваюць вадкасць з лёгкіх. — «НЧ».), але калі так, то гэта надзвычайнае здарэнне для кіраўніцтва калоніі. Таму што цяжка ўявіць, як такое наогул магло адбыцца, гэта неверагодна рэдкі выпадак для пенітэнцыярнай сістэмы Беларусі, — мяркуе чалец штаба Бабарыкі. — І калі інфармацыя праўдзівая, гэта выключны прыклад жудаснага абыходжання з палітвязнямі. Але раз ён ужо трапіў у бальніцу, значыць, нешта сапраўды здарылася.