МУС працягвае пашыраць колькасць «экстрэмістаў». Хронікі рэпрэсій 6 лістапада

Цяпер у афіцыйным «спісе экстрэмістаў» — ужо 5957 чалавек. Большасць з новых фігурантаў абвінавачаныя ў «садзейнічанні экстрэмісцкай дзейнасці». Тым часам у Мінску прызналі «экстрэмісцкімі» сацсеткі трэш-стрымера Мелстроя, КДБ выклікае на «гутаркі» антыкрызісных кіраўнікоў, а адвакатку Кацярыну Жаўтаногу асудзілі па крымінальнай справе.

У «Спіс экстрэмістаў» дадалі яшчэ 15 прозвішчаў — цяпер у ім 5957 чалавек

6 лістапада МУС зрабіла абнаўленне «Пераліка грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці».

Сярод гэтых 15 чалавек у абвінавачванні 13 прысутнічае арт. 361-4 КК (садзейнічанне экстрэмісцкай дзейнасці).

«Вясна» публікуе апошнюю версію спіса.

Сацсеткі стрымера Мелстроя прызнаныя «экстрэмісцкімі»

Адпаведнае рашэнне было прынятае судом Цэнтральнага раёна Мінска 4 лістапада па ініцыятыве ГУБАЗіК.

Пад забарону трапілі «рэсурсы, лагатыпы і знакі» стрымера Андрэя Бурыма (Мелстроя).

Паведамляецца, што гэта зроблена з-за «пачасціўшыхся хуліганстваў, парушэнняў грамадскага парадку і правакацый, да якіх заклікаў Мелстрой за нібыта грашовую ўзнагароду».

КДБ пачаў выклікаць на «гутаркі» антыкрызісных кіраўнікоў

Паводле інфармацыі «Люстэрка», у іх пытаюцца пра палітычныя погляды, некаторых затрымліваюць на суткі, а кагосьці схіляюць да супрацоўніцтва.

«Данаты, карта паляка, засвяціліся на маршах ці ў размовах адпаведнага характару. І пачынаюцца пытанні: «Ну што, усвядоміў свае шпацыры па праспекце пяць гадоў таму? Як ставішся да дзейнай улады?» У кагосьці проста размовы, кагосьці закрываюць на пару дзён (у пятніцу затрымалі, у панядзелак адпусцілі), кагосьці — на два тыдні. Выбудоўваць стройную карціну з урыўкавых звестак я б не рызыкнуў, але такога ніколі не было, каб камітэтчыкі тузалі кіраўнікоў».

Як паведамляе reform.news, на падставе інфармацыі органаў дзяржбяспекі спынена дзеянне атэстатаў 19 антыкрызісных кіраўнікоў. Такое рашэнне 6 лістапада прыняла Атэстацыйная камісія Дэпартамента па санацыі і банкруцтве.

У якасці падставы для спынення дзеяння атэстата кіраўніка паказана «паступленне ў Дэпартамент ад органаў дзяржаўнай бяспекі інфармацыі аб здзяйсненні атэставаным асобай дзеі, які стварае пагрозу нацыянальнай бяспекі».

Па крымінальнай справе асудзілі Кацярыну Жаўтаногу, адвакатку Сцяпана Латыпава

Адвакацкае бюро, у якім працавала Жаўтанога, спецыялізавалася на кансультаванні бізнэса, але ў 2020-м перакваліфікавалася на адміністратыўнае права і бясплатна дапамагала затрыманым на Акрэсціна, піша «Наша Ніва». 

У Кацярыны забралі ліцэнзію ў ліпені 2021 года.

Як выявілася, цяпер юрыстку асудзілі па крымінальнай справе за «распальванне варожасці». Хутчэй за ўсё, Жаўтанога атрымала хімію з накіраваннем.