Мікалай Статкевіч адказаў на прапанову «папрасіцца»

Грамадства

22 студзеня Марына Адамовіч, жонка былога кандыдата на прэзыдэнта Мікалая Статкевіча, атрымала ад мужа ліст, у якім той фактычна адказаў на прапанову Лукашэнкі напісаць прашэнне аб памілаванні, каб выйсці на волю.



statkievicz.jpg

Ліст быў адпраўлены 16 студзеня, калі палітвязень не мог яшчэ ведаць ні аб «дыялогу» з рэдактарамі, ні аб чарговай прапанове «папрасіцца». Як патлумачыла жонка палітвязня, у лісце Мікалай Статкевіч апісваў змест чарговага ўласнага ліста, які канфіскавала цэнзура.

Ліст быў напісаны ў адказ на спадзяванні аднаго з яго адрасатаў, «што калегі з СПГ (рэд. Сацыял-дэмакратычная партыя Германіі) цяпер ва ўрадзе, і яны з дапамогай таемнай дыпламатыі будуць дамагацца майго вызвалення, як Хадаркоўскага. Я напісаў яму, што супраць таемнай дыпламатыі там, дзе патрэбныя іншыя сродкі. І што я не Хадаркоўскі, бо я кандыдат у прэзідэнты, а не бізнэсовец. Таму ніякага прашэння я пісаць ня буду, бо паклікаў людзей на Плошчу і дзясяткі тысячаў прыйшлі, нягледзячы на страх. Здрадзіць такой колькасці людзей я ня здолею».


  Марына Адамовіч пракаментавала агрэсіўныя і нервовыя выказванні Аляксандра Лукашэнкі ў бок Мікалая Статкевіча пад час канферэнцыі (Лукашэнка назваў яго «палітычным трупам» - НЧ). Яна мяркуе, што такое жаданне абразіць і прынізіць чалавека, які ўжо тры гады знаходзіцца ў турме, з'яўляецца лепшым доказам таго, што кіраўнік краіны насамрэч лічыць Мікалая Статкевіча сваім палітычным супернікам. «Інакш яго б не трымалі ў турме», — мяркуе Марына Адамовіч.
Мікалай Статкевіч асуджаны на 6 гадоў пазбаўлення волі нібыта за арганізацыю беспарадкаў 19 снежня 2010 году. У студзені 2012 года ён быў асуджаны да пагаршэння ўмоў адбыцця пакарання і пераведзены ў магілёўскую турму №4.

statkevich.org