Лукашэнка: лянота і ўтрыманства пагражаюць незалежнасці краіны

У беларускім грамадстве ўсё шырэй распаўсюджваюцца лянота і ўтрыманства, і ў гэтым крыюцца суб'ектыўныя пагрозы незалежнасці краіны. Пра гэта заявіў Аляксандр Лукашэнка 1 ліпеня на ўрачыстым сходзе, прысвечаным Дню Незалежнасці Беларусі.



 "Думаць, што дзяржава павінна рабіць усё і за ўсіх, — небяспечная памылка. Скажу больш жорстка — гэта прамы шлях да дэградацыі нацыі, да застою і заняпаду", — лічыць Лукашэнка.

Усё часцей можна пачуць словы: "А навошта мне самому нешта рабіць? Вось ёсць дзяржава—хай яна пра мяне і клапоціцца", — сказаў ён, перадае БелТА.
 

На яго думку, некалькі прычын перашкаджаюць айчынным таварам канкураваць на знешніх рынках, у тым ліку суб'ектыўныя. "Часта мы працуем дрэнна, спусціўшы рукавы. П'янства на працоўных месцах да канца не выкаранілі. Тэхналогіі часам не выконваюць, на працы многія не напружваюцца, добрасумленнасць становіцца рэдкасцю", — адзначыў кіраўнік дзяржавы. Гэтыя праблемы датычацца не толькі вытворчасці, але і сферы абслугоўвання, дадаў ён.
 

У выніку ў Беларусі работнікі вырабляюць прадукцыі ў разы менш, чым амерыканцы, і больш нізкай якасці, чым немцы, канстатаваў прэзідэнт. "І пры гэтым не напружваюцца, як тыя ж кітайцы, карэйцы або японцы", — сказаў ён.
 

У Беларусі сотні тысяч вельмі сумленных і працавітых людзей, на якіх трымаецца краіна, лічыць прэзідэнт. Але побач з імі, па яго словах, яшчэ шмат п'яніц і гультаёў, якія ўявілі, што дзяржава можа і павінна зрабіць за іх абсалютна ўсё. "Больш за тое, яны перашкаджаюць працаваць, уплываючы на ўсіх, хто хоча працаваць", — лічыць кіраўнік дзяржавы.
 

Падобныя настроі захопліваюць нават так званых прыхільнікаў свабоднага рынку, адзначыў ён. "Цікава назіраць, як адны і тыя ж людзі ў тэорыі выступаюць за поўную лібералізацыю за ўсё і ўся, за сыход дзяржавы з усіх сфер, але ледзь дзесьці з'яўляецца праблема, як тыя ж самыя людзі пачынаюць стагнаць: а дзе ж дзяржава, чаму не працуюць чыноўнікі і далей у тым жа духу", — сказаў ён.
 

telegraf.by

Лукашэнка: калі народ абыякавы — поспеху не будзе

Нацыю заспакоіла і паслабіла тое, што моцная беларуская дзяржава рабіла вельмі шмат для абароны сваіх грамадзян, заявіў Аляксандр Лукашэнка.
 

Улады не дазволілі кінуць грамадства ў бездань дзікага рынку ўзору хвацкіх 90-х. "Не маючы прыродных рэсурсаў, мы пабудавалі сацыяльную эканоміку, дзе на першым месцы—клопат пра чалавека, пра тое, каб ён заўсёды меў працу, даступную медыцыну, адукацыю, жыў у міры і бяспецы, каб быў абаронены ў старасці. Мы пастаянна аказваем і будзем аказваць жорсткі, каласальны ціск на дзяржапарат, на чыноўнікаў, прымушаючы іх служыць людзям, якія не бяруць чужога, вядуць сціплы лад жыцця", — адзначыў Лукашэнка.
 

Разам з тым беларусы павінны ясна разумець: незалежнасць краіны — клопат кожнага, нагадаў ён.
 

"І нават калі дзяржава напружвае ўсе свае сілы, а народ застаецца пасіўным і абыякавым, то справа гэтая не займее поспеху", — сказаў Аляксандр Лукашэнка.
 

"Мы толькі тады можам быць абсалютна спакойныя за лёс незалежнай Беларусі, калі кожны яе грамадзянін будзе ставіць пытанне так: што я зрабіў для краіны, а не што краіна павінна зрабіць для мяне? Пакуль жа мы вельмі часта чуем другую частку пытання і вельмі рэдка — першую", — адзначыў Лукашэнка.