У Германіі адзначаюць 60-годдзе радарнага кантролю
60 гадоў таму ў Германіі пачалі змагацца з перавышэннем хуткасці новымі сродкамі. Хуткасны радар упершыню выкарысталі ў Дзюсельдорфе 21 студзеня 1957 года.
Дырэктар Паліцэйскага музея ў Зальцкотэне Фелікс Хофман у арыгінальнай уніформе тых гадоў
Хуткасны радар VRG2 быў распрацаваны фірмай Telefunken і ўпершыню ўжыты на практыцы ў Дзюсельдорфе 21 студзеня 1957 года.
З нагоды юбілею радарнага кантролю ў Германіі дырэктар Паліцэйскага музея ў нямецкім горадзе Зальцкотэн Фелікс Хофман сустрэў карэспандэнта агенцтва dpa ў арыгінальнай уніформе тых гадоў.
Неабходнасць узмацніць барацьбу з ліхачамі пры дапамозе новых тэхнічных сродкаў была выкліканая шакавальным ростам ліку ахвяр ДТЗ.
Нягледзячы на адносна нізкую інтэнсіўнасць руху, штогадовая колькасць смяротных выпадкаў у Заходняй Германіі 60 гадоў таму дасягнула 13 тысяч чалавек. Зараз гэты паказчык складае каля 3,5 тысяч у цэлым па краіне.
Адзначым, што першы кантроль хуткасці нямецкія паліцыянты правялі яшчэ ў 1906 годзе. Зрабілі яны гэта тады з дапамогай простага секундамера на загадзя замераным адрэзку дарогі ў бадэнскам горадзе Кель.
Паводле Deutsche Welle