Лідар Каталоніі: Мы заваявалі права на незалежнасць

Кіраўнік ураду Каталоніі Карлес Пучдэмон заявіў у Барселоне, што Каталонія заваявала права на незалежную дзяржаву.

Паводле яго, рэферэндум адбыўся, нават нягледзячы на супраціў з боку Мадрыду.

Улады Каталоніі паведамілі, што 90 % удзельнікаў галасавання падтрымалі ідэю незалежнасці ад Іспаніі. Пры гэтым яўка была невысокай — у галасаванні, паводле ўладаў Каталоніі, узялі ўдзел 42,3 % выбарцаў.

Канстытуцыйны суд абвясціў рэферэндум незаконным. Сотні чалавек пацярпелі ў сутычках з паліцыяй, якая спрабавала перадухіліць галасаванне.

Спікер каталонскага парламенту Кармэ Форкадэль склікала пасяджэнне прадстаўнікоў усіх партый на 14:00 паводле мясцовага часу ў панядзелак, паведамляе іспанскае агенцтва «Efe».

Згодна з каталонскім законам аб рэферэндуме, прынятым каталонскім парламентам 6 верасня, а пасля адмененым Канстытуцыйным судом Іспаніі, парламент мусіць правесці пасяджэнне па пытанні аб абвяшчэнне незалежнасці праз двое сутак пасля абвяшчэння афіцыйных вынікаў рэферэндуму.

 Паводле belsat.eu