Новы палітычны сезон: апазіцыя Беларусі скіраваная на выбары
Новы палітычны сезон у Беларусі будзе вызначацца падрыхтоўкай да выбараў прэзідэнта дзяржавы, што мусяць адбыцца ў 2015 годзе. Партыі і рухі маюць і шэраг уласных мэтаў.
Усе ўдзельнікі палітычнага працэсу ў Беларусі згодны з тым, што галоўным падзеяй наступнага года стануць выбары кіраўніка дзяржавы. Апазіцыя спрабуе вызначыцца з адзіным кандыдатам. Пры гэтым многія апаненты ўлады мяркуюць, што час ужо страчаны.
Па словах старшыні Партыі БНФ Аляксея Янукевіча, асноўным момантам новага палітычнага сезону для арганізацыі, якую ён узначальвае, з'яўляецца падрыхтоўка да выбараў кіраўніка дзяржавы ў 2015 годзе. БНФ збіраецца актыўна ўдзельнічаць у працэсе вызначэння адзінага кандыдата ў прэзідэнты ад апазіцыі. Янукевіч спадзяецца, што і астатнія суб'екты палітычнага жыцця пагодзяцца на тое, каб ад дэмакратычных сіл усё ж быў адзіны прэтэндэнт на прэзідэнцкі пост.
Акрамя таго, кажа лідэр БНФ, яго партыя будзе працягваць і пашыраць кампанію супраць прысутнасці на тэрыторыі Беларусі расійскіх ваенных баз, а таксама супраць Еўразійскага эканамічнага саюза, "у які ўцягваюць Беларусь". "Я думаю, што менавіта гэта будзе асноўным пытаннем на бліжэйшых прэзідэнцкіх выбарах", — адзначае Янукевіч. Акрамя таго, БНФ працягне ўдзельнічаць у кампаніі "Народны рэферэндум" — збіраць подпісы і праводзіць розныя мерапрыемствы.
Янукевіч звяртае ўвагу, што ў новым палітычным сезоне дэмакратычныя арганізацыі апынуцца ў больш складаных умовах, чым гэта было раней. "Мы мяркуем, што магчымасці свабодна праводзіць вулічную агітацыю і іншыя мерапрыемствы, як гэта было падчас прэзідэнцкай кампаніі 2010 года, у гэтым палітычным сезоне не будзе", — прагназуе апазіцыянер.
Кіраўнік Аб'яднанай грамадзянскай партыі (АГП) Анатоль Лябедзька сцвярджае, што ў яго структуры няма такога паняцця, як пачатак палітычнага сезону. АГП працягвае працу па пяці прыярытэтных тэмах і кампаніях, вызначаным на апошнім з'ездзе на бліжэйшыя тры гады. Гэта "Стоп кошты!" і праблемы інфляцыі, "Не — карупцыі!", "Мільён новых працоўных месцаў", "Бяспека Беларусі і грамадзян краіны", а таксама гендэрная праблематыка.
Па словах Лябедзькі, асаблівая ўвага ўсё ж такі надаецца праблеме карупцыі, арганізоўваюцца "круглыя сталы" і праграмы на АГП-TV. Актывісты партыі ладзяць паездкі па рэгіёнах, рыхтуюцца новыя выпускі бюлетэня "Голас розуму". Не застанецца без увагі партыі і праблема зьніклых палітыкаў і журналіста.
Натуральна, яшчэ адным важным пунктам з'яўляецца падрыхтоўка да прэзідэнцкіх выбараў, але гэта ўжо ў рамках рашэнняў кааліцыйных пытанняў, кажа палітык.
- Мы павінны навязаць уладзе свой сцэнар і выкарыстоўваць гэтую кампанію для таго, каб растлумачыць грамадзянам, навошта патрэбныя свабодныя і дэмакратычныя выбары, — адзначыў Лябедзька.
Сустаршыня аргкамітэта па стварэнні партыі БХД Павал Севярынец паведаміў, што яго арганізацыя засяродзіцца, па-першае, на кампаніі "Народны кантроль", якая ўключае ў сябе подкампании сацыяльнага характару ў буйных гарадах Беларусі. Гэта антыалкагольныя мерапрыемствы, мерапрыемствы ў падтрымку будаўніцтва паліклінік, пытанні экалогіі. "Ужо сабрана больш за 20 тысяч подпісаў. Такім чынам мы працуем з людзьмі напярэдадні самай важнай палітычнай кампаніі 2015 года", - падкрэсліў Севярынец.
БХД таксама будзе ўдзельнічаць у вызначэнні адзінага кандыдата ад дэмакратычных сіл на маючых адбыцца выбарах кіраўніка дзяржавы.
Ліберальна-дэмакратычную партыю (ЛДП) эксперты лічаць спарынг-партнёрам дзеючай улады. Лідэр ЛДП Сяргей Гайдукевіч ужо двойчы ўдзельнічаў у прэзідэнцкіх выбарах — у 2001 і 2006 гадах. У 2010 годзе ён зняў сваю кандыдатуру, а ў 2015 зноў будзе змагацца за пасаду прэзідэнта.
Рух "За свабоду" працягне правядзенне кампаніі "Народны рэферэндум". Па словах лідэра арганізацыі Аляксандра Мілінкевіча, цяпер па ўсёй краіне праводзяцца "круглыя сталы", дзе з удзелам экспертаў абмяркоўваюцца пытанні, якія плануецца вынесці на плебісцыт.
Акрамя таго, кажа палітык, зараз вельмі важна падрыхтаваць кангрэс дэмакратычных сіл, на якім павінен быць абраны адзіны кандыдат ад дэмакратаў на прэзідэнцкіх выбарах 2015 года. "Я веру, што шанец ёсць, гэта прадэманстравала б, што апазіцыя ўмее аб'ядноўвацца, што яна адказная, па меншай меры, большая яе частка. Гэта вельмі важна для беларусаў", — упэўнены Мілінкевіч. Сёння трэба зрабіць усё, кажа ён, каб людзі захацелі прыходу дэмакратаў да ўлады. "Нават калі сёння сацыёлагі кажуць, што шанцаў на перамогу няма, заўтра такая магчымасць можа з'явіцца", — гаворыць палітык.