«Мінск — палітычная пляцоўка Масквы», — ва Украіне не чакаюць прарыўных рашэнняў ПА АБСЭ

Украінскі палітычны эксперт Аляксандар Салантай заявіў, што галоўным інтарэсам Украіны на пасяджэнні Парламэнцкай асамблеі АБСЭ ў Мінску мае стаць праблема ўкраінскіх грамадзян, якія незаконна ўтрымліваюцца на тэрыторыі Расіі.

«Украінская дэлегацыя мае выкарыстаць гэтую пляцоўку, каб яшчэ раз гучна заявіць, што на тэрыторыі Расеі ёсць закладнікі — гэта ўкраінскія грамадзяне. Гэта трэба зрабіць так сама гучна, як на мінулым пасяджэнні асамблеі заявілі пра патрабаванне да Расіі вярнуць Крым», — сказаў Аляксандр Салантай.
У той жа час экспэрт перакананы, што правядзенне пасяджэння ПА АБСЭ ў Мінску ёсць недарэчным.
«Яшчэ нядаўна ў Мінску разганялі людзей, забаранялі святкаваць Дзень Волі, затрымлівалі і сотнямі рабілі прысуды. За апошні год ёсць шмат выпадкаў экстрадыцыі ці перадачы ўкраінцаў рускім на запыты ФСБ. Мінск — гэта вядомая палітычная пляцоўка Масквы, а Расія для нас — краіна-агрэсар», — дадаў ён.
«Праваабаронцы з усіх еўрапейскіх арганізацый, у тым ліку і ўкраінскія, звярталіся з патрабаваннем не праводзіць пасяджэнне ў Мінску. Але тым не менш на гэта не звярнулі ўвагу. Гэта азначае, што ніякіх сур’ёзных, глабальных рашэнняў там не будзе. У Мінску гэта апрыёры немагчыма», — кажа Аляксандр Салантай.
Паводле эксперта, Парламенцкая асамблея АБСЭ павінна акцэнтаваць сваю дзейнасць на публічнай абароне правоў чалавека і грамадзянскіх свабодаў.
«А гэтую сваю базавую функцыю ПА АБСЭ ў Мінску не можа выканаць нават прыблізна, таму што давядзецца размаўляць пра выбары, напрыклад, ці аб правах чалавека ці абароне свабодаў у краіне, у якой ёсць з гэтым праблемы», — дадаў эксперт.
Аляксандр Салантай таксама выключыў магчымасць прыняцця рашэння пра змене фармату маніторынгавай місіі АБСЭ, якая працуе на Данбасе.
«Ніякіх сур’ёзных рашэнняў у Мінску з нагоды павышэння эфектыўнасці місіі АБСЕ на Данбасе не можа быць. Але, магчыма, яно і будзе абмяркоўвацца», — адзначыў украінскі экспэрт.
Украінскую дэлегацыю на пасяджэнні ПА АБСЭ ў Мінску будзе ўзначальваць кіраўнік фракцыі «Блок Пятра Парашэнкі» ў Вярхоўнай Радзе Артур Герасімаў.
Паводле Радыё Свабода