Адзіным будзеш?

Лідары беларускай апазіцыі разважаюць, ці ісці кандыдатамі на прэзідэнцкія выбары ў 2015 годзе.



Першай пра свае амбіцыі заявіла Вольга Карач з арганізацыі «Наш дом». Гаворыць, што пойдзе на выбары, калі «народ гэтага захоча». А вось Анатоль Лябедзька пакуль не ведае, ці будзе балатавацца.
«Пакуль для мяне першачарговай задачай стаіць праймерыз. Калі яны пройдуць з удзелам усіх палітычных цяжкавагавікоў Беларусі, то я гатовы ўдзельнічаць у такіх праймерыз».
Тым не менш Анатоль амбіцыямі не абдзелены. Гаворыць, што калі карты лягуць і аблокі сыдуцца – у праймерыз пераможа і супраць Лукашэнкі выйдзе. Яно зразумела – за амаль дваццаць гадоў у апазіцыі лідар АГП так ніколі і не быў кандыдатам на прэзідэнцкіх выбарах. Хоць і быў да гэтага вельмі блізка ў 2005 годзе, але тады адзіным выбралі Мілінкевіча.
Сяргей Калякін на выбары таксама ісці гатовы. Але прымаць рашэнне сам не будзе – спадзяецца на партыю. Праўда, і пра перамогу на прэзідэнцкіх выбарах Калякін не гаворыць. Згадвае толькі пра «неабходнасць прыцягнуць людзей да вызначэння альтэрнатывы».
«Трэба адабрэнне партыі на гэта. Таму я сёння не гатовы адказаць. Але калі воля партыі будзе, то я гатовы прыняць удзел у гэтым эксперыменце. Для таго, каб даць адказ самому сабе. Ці магчыма гэта ў Беларусі, ці магчыма прыцягнуць людзей да актыўнага вызначэння персанальнай альтэрнатывы Лукашэнку».
А вось лідар БНФ Аляксей Янукевіч гаворыць проста – у выбарах удзельнічаць гатовы, адзіным буду.
«Адказ вельмі просты – я гатовы ўдзельнічаць у прэзідэнцкіх выбарах у якасці адзінага кандыдата. У прынцыпе, адзіны кандыдат будзе магчымы толькі калі адбудзецца дамоўленасць паміж рознымі палітычнымі сіламі».
Янукевіч мяркуе, што на выбарах 2015 года неабходны адзіны кандыдат. Таму ён асабіста і ўся партыя будуць настойваць менавіта на такім развіцца перадвыбарных падзеяў.
Апанент Янукевіча – Віталь Рымашэўскі з БХД – гатовы ісці на выбары і як адзіны кандыдат, і як кандыдат ад хрысціянскіх дэмакратаў. Гаворыць, што БХД апошнім часам толькі ўзмацняецца.
«Беларуская хрысціянская дэмакратыя сцвердзіла, што яна можа вылучаць кандыдата на прэзідэнцкіх выбарах. І прэзідэнцкая кампанія для нас можа быць паспяховай, адной з самых паспяховых. За апошнія гады БХД стала толькі мацнейшай».
Самым жа таямнічым кандыдатам на выбары-2015 застаецца Уладзімір Някляеў. Калі верыць палітыку, то балатавацца ён гатовы, «калі трэба будзе». Каму можа гэта спатрэбіцца, лідар кампаніі «Гавары праўду» пакуль не ўдакладняе.
euroradio.fm