Пра жыццё, каханне, вечнасць: інклюзіў-тэатр «і» прадставіў новы спектакль

Сямейны інклюзіў-тэатр «i»прадставіў новы спектакль "Аднойчы ў вялізным горадзе": кранальную гісторыю пра страчаную надзею і шанец на выратаванне.

8 кастрычніка на сцэне Беларускага дзяржаўнага акадэмічнага музычнага тэатра адбылася прэм'ера спектакля «Аднойчы ў вялізным горадзе» сямейнага інклюзіў-тэатра «i». Генеральную падтрымку спектаклю аказала кампанія velcom. Пастаноўка ўвойдзе ў рэпертуар тэатра, наступны паказ пройдзе 19 лістапада.

Убачыць знаёмую гісторыю ў новым ракурсе прыйшлі каля 400 чалавек. Фантастычная яркая казка з 3D-відэапраекцыяй Сяргея Ісакава і маляўнічымі дэкарацыямі мастачкі Ганны Сілівончык падымае пытанні выбару і няроўнасці, жыцця і смерці, простай і зразумелай мовай распавядае пра вечнасць гледачам любога ўзросту. Такім чынам, п'еса становіцца спосабам дыялогу паміж бацькамі і дзецьмі на сцэне і па-за яе. «Дзеці таксама хочуць казаць пра сур'ёзныя рэчы, і наш спектакль — нагода для такой размовы», — кажа прадусар Леанід Дынерштэйн.

У аснове сюжэту спектакля «Аднойчы ў вялізным горадзе» — апавяданне Ф. Дастаеўскага «Хлопчык у Хрыста на ёлцы». Гэта гісторыя хлопчыка, які перад Калядамі страціў сваю сям'ю і застаўся зусім адзін на халодных вуліцах вялікага горада без шанцаў на выратаванне. Дапамога прыходзіць нечакана: воляй цуду маленькі валацуга трапляе на чароўную ангельскую елку, дзе да яго вяртаецца надзея на лепшую будучыню. Спектакль падрыхтаваны сямейным інклюзіў-тэатрам «i» з удзелам выхаванцаў Студыі Ірыны Пушкаровай. Акрамя студыйцаў, у пастаноўцы прынялі ўдзел і іх бацькі — таму тэатр называецца «сямейным». Рэжысёрам-пастаноўшчыкам выступіла Ірына Пушкарова, мастак-пастаноўшчык спектакля — Павел Архангельскі, танцавальныя нумары падрыхтаваў балетмайстар Дзяніс Дадзішкіліані, музыку да пастаноўкі напісала Аляксандра Сандлер, пераклад аповеду выканала Вера Жыбуль. Рэжысёр спектакля — Генадзь Фамін. Аўтары адзначаюць незвычайнасць інтэрпрэтацыі аповядання Дастаеўскага: у пастаноўцы паказаны беларускія абрады і традыцыі, а сам сцэнар напісаны на беларускай мове.

«Гэта ўжо не дзіцячы спектакль, гэта спектакль, у якім дзеці і дарослыя іграюць для дарослых і дзяцей. У ім занятыя цэлыя сем'і, сярод іх ёсць як акцёры-прафесіяналы, так і аматары-дарослыя — бацькі, з якімі выдатна папрацаваў балетмайстар Дзяніс Дадзішкіліані», — распавядае Леанід Дынерштэйн.


У акцёрскім складзе пастаноўкі — больш за 100 чалавек, у тым ліку бацькоў студыйцаў і хор музычнай школы №10 «Музычныя пацеркі». «Прыйшоў час, калі склалася добрая творчая каманда і мы змаглі пры дапамозе відэапраекцыі і дэкарацый, з адпаведнай тэатральнай падрыхтоўкай дзяцей увасобіць нашу даўнюю задумку, — дзеліцца падрабязнасцямі працы над спектаклем мастацкі кіраўнік студыі Ірына Пушкарова. — Усяго ў спектаклі «Аднойчы ў вялізным горадзе» занята 106 чалавек, сярод іх — 8 дзяцей з аўтызмам. Зараз у нашай студыі займаецца 30 дзяцей з асаблівасцямі, мы працуем з імі па розных методыках: хтосьці займаецца індывідуальна, хтосьці ў групе, хтосьці ходзіць на вакал, хтосьці на базавыя музычныя заняткі. Тыя, хто адчувае сябе больш-менш упэўнена, навучаюцца акцёрскаму майстэрству і па меры гатоўнасці выходзяць на сцэну».


З падрыхтоўкай да выступлення на новай пляцоўцы са складаным тэхнічным абсталяваннем і залай умяшчальнасцю больш за 700 месцаў трупе дапамог генеральны партнёр Сямейнага інклюзіў-тэатра «i» — кампанія velcom.

«Стварэнне інклюзіўнага грамадства роўных магчымасцяў ужо не першы год застаецца адным з галоўных прыярытэтаў кампаніі velcom у галіне КСА, таму мы з цікавасцю сочым за поспехамі і новымі ідэямі Сямейнага інклюзіў-тэатра «i». 3D-спектакль «Аднойчы ў вялізным горадзе» — пастаноўка новага ўзроўню, якая стала заканамерным вынікам высілкаў тэатра. Наша праца з ім працягваецца, мы верым, што такое партнёрства спрыяе развіццю і тэатра як адзінага ў сваім родзе праекта па працы з дзецьмі з аўтызмам, і беларускага грамадства ў цэлым», — адзначыў Мікалай Брэдзелеў, начальнік аддзела карпаратыўных камунікацый velcom.

Творчую працу тэатр вядзе пастаянна: акрамя працы над 3D-прэм'ерай, калектыў імкнецца ўвасобіць мноства іншых, не менш смелых задумак. «У нас у планах пастаноўка аб пачуццях па п'есе, якую прыдумаў адзін з нашых студыйцаў з аўтызмам Кастусь Жыбуль, — распавядае Ірына Пушкарова. — У гэтай пастаноўцы дзеці выступяць паўнавартаснымі суаўтарамі: яны будуць пісаць сцэнар, музыку, паўдзельнічаюць у рэжысуры — гэта значыць атрымаюць максімальную магчымасць для творчасці. Самае галоўнае, каб дзіця, юны акцёр, убіраў толькі лепшае, мог расці і развівацца ў кожнай сваёй ролі».

На базе тэатральнай студыі Ірыны Пушкаровой харэаграфіі, пластыцы, вакалу, акцёрскай ігре і размове адзін з адным вучацца розныя дзеці, сярод іх — і дзеці з аўтызмам. Сачыць за навінамі інклюзіўнага тэатра «i», а таксама атрымаць падрабязную інфармацыю аб паказах 6 лістапада і 3 снежня можна на сайце https://www.theatre-i.by/ і на афіцыйнай старонцы ў facebook.
Паводле пост-рэлізу