Шэсць год калоніі запрасіў пракурор для палітвязня Віталя Барысевіча

У судзе Ленінскага раёна Мінска 11 сакавіка распачаўся працэс над палітвязнем Віталём Барысевічам. Яго абвінавачваюць ва ўдзеле ў масавых беспарадках паводле ч. 2 арт. 293 Крымінальнага кодэкса.

Справу разглядае суддзя Таццяна Шоцік.

Віталя Барысевіча затрымалі 24 лістапада 2021 года. Да суда ўтрымліваўся ў СІЗА №1 Мінска, паведамляюць праваабаронцы.

Па папярэдняй інфармацыі, у тэлеграм-канале МУС Беларусі з'явілася паведамленне пра тое, што Віталь нібыта ў жніўні 2020 года прымаў актыўны ўдзел у масавых беспарадках у раёне гандлёвага цэнтра «Рыга».

«Разам з іншымі агрэсіўна настроенымі ўдзельнікамі здзяйсняў пагромы і знішчаў маёмасць: ламаў тратуарную плітку, узводзіў барыкады, перакрываў рух транспарту», — паведамляла ведамства.

Вядома, што ў першы дзень судовага пасяджэння абвінавачанне запрасіла для Віталя пазбаўленне волі ў калоніі ўзмоцненага рэжыму тэрмінам на 6 год.

Судовае пасяджэнне працягнецца ў панядзелак, 14 сакавіка.