Працягваецца збор подпісаў у падтрымку Даната Скакуна
На платформе petitions.by працягваецца збор подпісаў з патрабаваннем стварыць міжведамасную камісію для комплекснай праверкі працы ўсіх датычных да вынясення абвінаваўчага прысуду Данату Скакуну. Сабрана ўжо амаль 1000 подпісаў.
Гімназіст Данат Скакун асуджаны на 8 год зняволення за нібыта замах на забойства настаўніцы Валянціны Губарэвіч, які меўся 23 мая 2016 года. Але ў тых, хто сачыў за гэтай справай, засталося шмат пытанняў адносна датычнасці хлопца да гэтага злачынства, на якія следства так і не дало адэкватнага адказу.
Для следчых Донат так і застаўся адзіным падазраваным, іншых версій, акрамя той, якую агучыла Губарэвіч, яны не разглядалі. Мінскі гарадскі суд, нягледзячы на шматлікія супярэчнасці ў справе і наяўнасць у абвінавачанага алібі, 7 мая 2017 года прысудзіў Даната на 8 гадоў зняволення. Вярхоўны Суд Рэспублікі Беларусь 19 верасня 2017 года пастанавіў пакінуць прысуд без змен.
Аднак у матэрыялах справы, агучаных у інтэрнэце, змяшчаецца мноства пацверджанняў таго, што Донат не рабіў злачынства. Аўтары петыцыі прыводзяць некаторыя факты, якія дазваляюць паставіць пад сумнеў вынікі следства. Напрыклад, следства і суд праігнаравалі наяўнасць у Даната алібі: раніцай 23 мая ён знаходзіўся ў гімназіі з 8.13 да 8.30, пры гэтым да 8.20 злачынства не магло быць здзейснена, так як В. В. Губарэвіч была ў кабінеце з настаўніцай малодшых класаў, а з 8.20 да 8.30 Донат знаходзіўся на іншым паверсе з аднакласнікам, разам з якім у 8.30, па дадзеных камеры відэаназірання, яны выйшлі з гімназіі.
Таксама не абгрунтаваны матыў нападу: Донат ўраўнаважаны чалавек без псіхічных адхіленняў, характарызуецца выключна станоўча, ён спакойна ставіўся да ацэнак у школе, яны не былі яго самамэтай — ніякае перажыванне ня прымусіла б Даната напасці на чалавека. У першы ж вечар пасля затрымання Донат пагадзіўся прайсці праверку на паліграфе, і вынікі не засведчылі яго дачыненне да справы, а вось пацярпелая прайсці даследаванне на паліграфе адмовілася.
Суд адмовіўся праверыць магчымасць здзяйснення злачынства Данатам: не быў праведзены следчы эксперымент, не зроблены хранаметраж падзей, а гэта пацвердзіла бы алібі Даната і непраўдзівасць паказанняў пацярпелай. Усе хадайніцтвы абароны, якія маглі паўплываць на рашэнне суда і дапамагчы высветліць ісціну ў гэтай справе, былі адхіленыя. Праігнараваны той факт, што на месцы злачынства не было ніякіх слядоў Даната — ні адбіткаў пальцаў, ні крыві.
Аўтары петыцыі прыводзяць і іншыя факты, якія ставяць пад сумнеў якасць працы следства і суда.
Такое аднабаковае і прадузятае следства і судовы разгляд справы можа сведчыць аб наяўнасці карупцыйных сувязей і асабістай зацікаўленасці службовых асоб у выніках разбору.
Ініцыятары петыцыі звяртаюцца да кіраўніка краіны А.Р. Лукашэнка і Дзяржаўнага сакратара Савета Бяспекі Рэспублікі Беларусь С.В. Зася з просьбай разабрацца ў гэтай справе і дапамагчы аднавіць справядлівасць.
Для гэтага, на іх думку, неабходна:
- стварыць міжведамасную камісію і правесці комплексную праверку працы ўсіх датычных да вынясення абвінаваўчага прысуду Данату Скакуну: прадстаўнікоў Следчага камітэта Рэспублікі Беларусь, Дзяржаўнага камітэта судовых экспертыз Рэспублікі Беларусь, Мінскага гарадскога суда, пракурора, Вярхоўнага Суда Рэспублікі Беларусь;
- прыцягнуць да адказнасці асоб, якія маюць дачыненне да фальсіфікацыі доказаў (у тым ліку следчых, якія ўдзельнічалі ў допыце Даната ў першую ноч пасля затрымання, — атрыманае на ім прызнанне было кваліфікавана судом як «здабытае з парушэннем заканадаўства»);
- прыцягнуць да адказнасці службовых асобаў, якія ў парушэнне прэзумпцыі невінаватасці распаўсюдзілі праз СМІ заведама ілжывыя звесткі пра гэтую справу.
Аўтары петыцыі просяць усіх, у каго ёсць будзь-якія сумневы ў датычнасці Даната Скакуна да гэтай справы, паставіць свой подпіс пад зваротам.