Палітзняволеная напісала пра збіццё і катаванні на кавалку туалетнай паперы
Крыніцы «Белсату» перадалі рэдакцыі ліст ад палітзняволенай Кацярыны Новікавай. На кавалку туалетнай паперы Кацярына паведаміла, што яе «білі ўсім кабінетам».
Кацярына Новікава. Фота ПЦ «Вясна»
Кацярыну Новікаву затрымалі ў пачатку лета 2023 года. Яе схапілі ў адной начнушцы, у якой яна прабыла ў СІЗА да першай перадачы ад родных.
Кацярыну Новікаву, як адзначае «Вясна», судзілі паводле сямі артыкулаў, ад «Распальвання варожасці» да «Гвалту супраць міліцыянта». Працэс вяла суддзя Алена Шылько, у выніку прысудзілі 6,5 года зняволення і штраф Br 3000, якія яна мае выплаціць у якасці кампенсацыі «пацярпелым».
«Білі ўсім кабінетам за інтэрв'ю»
У лісце на кавалку туалетнай паперы жанчына піша, што пры затрыманні яе біў супрацоўнік ГУБАЗіКу Іван Васілевіч, затым у штабе ГУБАЗіКу на Рэвалюцыйнай 3, яе «ставілі на сцяг, білі ўсім кабінетам». Сказалі, што б’юць за ейныя інтэрв’ю, за Telegram-канал і за ейныя звароты.
Лісты Кацярыне амаль не даходзяць. Яна піша таксама, што «малюнкі забаранілі».
Глядзіце таксама
«Я ўпала з другога паверху ложка, галавой аб драўляную паліцу, – піша зняволеная. – Здымак зрабілі, але больш за месяц не паведамляюць выніку».
«Маімі пацярпелымі з'яўляюцца тыя, ад каго я пацярпела ў 2020-м», — піша Кацярына Новікава.
Глядзіце таксама
Кацярына падазрае, што сын ейнай першай адвакаткі працуе на ГУБАЗіК, двух сваіх адвакатаў яна называе ніякімі.