Маці асуджанага да смяротнага пакарання заявіла пра пагрозы сыну
«Што ён заслужыў, то і атрымаў, але навошта ж здзекавацца так з чалавека і пагражаць».
Photo: pixabay.com/Creative Commons Public Domain CC0
Маці
асуджанага да смяротнага пакарання «чорнага рыэлтара» заявіла пра пагрозы сыну.
Маці асуджанага да смяротнага пакарання па справе «чорных рыэлтараў» Ігара Гершанкова заявіла пра пагрозы сыну і пра збіванні яго падчас знаходжання пад вартай.
Як паведамлялася, 21 ліпеня Магілёўскай аблсуд вынес прысуд фігурантам справы «чорных рыэлтараў». Сямён Беражны, а таксама муж і жонка Ігар і Таццяна Гершанковы абвінавачваліся ў здзяйсьненні забойстваў і падрыхтоўцы да здзяйсьнення забойстваў, выкраданні чалавека і падрыхтоўцы да выкрадання, а таксама ў махлярстве, разбоі, вымагальніцтве, крадзяжы або знішчэнні дакументаў, паведамялюць naviny.by.
Беражны і Гершанкоў прысуджаныя да смяротнага пакарання, Гершанкова — да 24 гадоў пазбаўлення волі, Калеснікаў — да 22 гадоў і аднаго месяца зняволення.
Ігар Гершанкоў ужо падаў скаргу на прысуд у Вярхоўны суд, паведаміла БелаПАН яго маці Людміла Гершанкова. Яна распавяла, што 28 ліпеня яна хадзіла на першае пасля 2,5 года следства і суда спатканне да сына ў турму. «І ён 28 ліпеня на спатканні нам сказаў, што 27 чысла прыходзіў чалавек, прадставіўся, што з УУС — Прымачок Анатоль Міхайлавіч. І пачаў пагражаць, што калі што-небудзь лішняе будзе распавядаць, то яго бацькам і сваякам будзе вельмі дрэнна. А чаму пагражаў, паняцця не маю», — распавяла маці асуджанага.
Яна таксама паведаміла, што, па словах сына, яго збівалі і прымушалі падпісаць прызнальныя паказанні. «Тое, у чым ён вінаваты, ён сам прызнаўся. А навошта прымушаць прызнавацца ў тым, у чым не вінаваты? Я яго не абараняю, але лічу, што павінна быць справядлівасць», — заявіла Людміла Гершанкова. Паводле яе слоў, у лістах сын «пісаў хітра, што яго не б'юць у турме». «Значыць, б'юць дзесьці ў іншым месцы», — робіць выснову жанчына.
«Што ён заслужыў, то і атрымаў, але навошта ж здзекавацца так з чалавека і пагражаць. Цяпер я баюся за сваё жыццё», — адзначыла Гершанкова. Яна паведаміла, што накіравала заявы пра пагрозы ў розныя інстанцыі, у прыватнасці ў Генеральную пракуратуру, МУС, дэпартамент выканання пакаранняў.
Аператыўна атрымаць каментар у УУС Магілёўскага аблвыканкама адносна сцвярджэнняў маці асуджанага на смерць Ігара Гершанкова пакуль не ўдалося.