«Любымі дасяжнымі сродкамі». Мемарандум ад дыяспары

Беларусы ЗША звярнуліся да беларусаў, якія засталіся ў Беларусі, з мемарандумам.

Прадстаўнікі беларускай дыяспары ў ЗША, “усведамляючы адказнасць за катастрафічныя наступствы расійскай ваеннай агрэсіі ва Украіне”, выступілі са зваротам да суродзічаў у Беларусі.

Прадстаўнікі беларускай дыяспары прызналі “наяўнасць акупацыйнага рэжыму на тэрыторыі Беларусі” і заклікалі беларускіх грамадзян “не заставацца ўбаку ад таго, што адбываецца”. Суродзічы ў Беларусі “мусяць любымі дасяжнымі сродкамі дамагацца” наступнага:

- тэрміновага і неадкладнага вываду расійскіх войскаў з тэрыторыі Беларусі;

- скасавання дамовы аб калектыўнай бяспецы (АДКБ), якая дазваляе Расіі выкарыстоўваць тэрыторыю Беларусі для ваеннай агрэсіі;

- анулявання незаконнай дамовы аб стварэнні так званай Саюзнай дзяржавы з Расійскай Федэрацыяй;

- выйсця з Мытнага звязу і іншых хаўрусаў, створаных нелегітымнай уладай з мэтай паступовага паглынання нашай краіны ўсходнім суседам;

- увядзення пашпартнага кантролю на мяжы з РФ.

Беларусь павінна вярнуцца ў Еўропу, а не заставацца ў ганебных хаўрусах з дзяржавай-агрэсарам!”

Аднак, адзначаюць аўтары мемарандуму, гэта будзе магчымым пасля “вырашэння першачарговай задачы – ліквідацыі антыбеларускага па сваёй сутнасці рэжыму Лукашэнкі. І за гэта неабходна штодзённа змагацца”.

Мемарандум падпісалі:

Ад імя Беларускага Нацыянальнага сакратарыяту (БНС) – Зянон Пазьняк;

Ад імя Беларуска-Амерыканскага згуртавання “ПАГОНЯ” – Віталь Зайка;

Ад імя Беларускай Асветніцкай Лігі Амерыкі (BELA) – Ірына Хадарэнка;

Ад імя Беларуска-Амерыканскай Асацыяцыі “BAZA” – Наталля Федарэнка;

Ад імя Беларускага Інстытута Амерыкі (BIA) – Алена Рыдзеўская;

Ад імя Беларускай Фундацыі імя Пётры Крэчэўскага – Галіна Тумаш-Павэлс.