«Любіце родную мову — яна дасканалая і прыгожая!»

Таварыства беларускай мовы звярнулася да ўсіх грамадзян Беларусі, а таксама прыхільнікаў Беларушчыны за мяжой з просьбай выказаць 21 лютага, у Дзень роднай мовы, сваю падтрымку жывому беларускаму слову.

«Давайце ў гэты дзень публічна праявім сваё шанаванне да старажытнай, тысячагадовай беларускай мовы, дзяржаўнай мовы Вялікага Княства Літоўскага, мовы трох Статутаў ВКЛ, трох Устаўных грамат БНР, сучаснай літаратурнай мовы Максіма Багдановіча, Янкі Купалы, Якуба Коласа, Уладзіміра Караткевіча, Ніла Гілевіча і Васіля Быкава.
Мы вітаем усіх, хто адзначае гэтае свята ў сваіх установах, і прапануем прыняць удзел у сёлетняй Агульнанацыянальнай дыктоўцы. Заклікаем вас хораша, з усмешкай на вуснах прамаўляць па-беларуску ў сям’і, на працы, у дзяржаўным транспарце, у крамах і навучальных установах. Запаўняйце па-беларуску розныя бланкі, квіткі, афіцыйныя паперы, анкеты і апытальныя лісты. Дашліце знаёмым і сваякам напісаныя па-беларуску ліст, паштоўку, тэлеграму, смс ці паведамленне па электроннай пошце.
Любіце родную мову — яна дасканалая і прыгожая!», — гаворыцца ў заяве ТБМ.
Трынаццатая Агульнанацыянальная дыктоўка, прысвечаная Міжнароднаму дню роднай мовы, пройдзе 21 лютага ў офісе ТБМ (вул. Румянцава, 13). Пачатак у 17:00. Дыктаваць сёлета будзе Ганна Севярынец.Узоры дыктовак можна знайсці ў газеце «Наша слова». Далучайцеся!