Прэмія ў гонар Міжнароднага дня роднай мовы

З Украіны прыйшла прыемная навіна. Сябры Саюза беларускіх пісьменнікаў і Нацыянальнага саюза пісьменнікаў Украіны сужэнцы Таццяна Кабржыцкая і Вячаслаў Рагойша сталі лаўрэатамі Прэміі імя Дмытра Нітчанкі (1905–1999), выдатнага ўкраінскага пісьменніка, літаратуразнаўца і грамадскага дзеяча.

Прэмія ўжо больш двух дзесяцігоддзяў прысуджаецца Лігай украінскіх мецэнатаў і раднёй Нітчанкі да 21 лютага — Міжнароднага дня роднай мовы і адначасова дня нараджэння самога пісьменніка. Лаўрэаты яе — тыя, хто, як сказана ў прэс-рэлізе прэміі, «абараняе і папулярызуе роднае слова, узнімае яго сацыяльны прэстыж і мае выразную грамадзянскую пазіцыю...
Доктар філалогіі, прафесар Вячаслаў Рагойша і кандыдат філалогіі, дацэнт Таццяна Кабржыцкая шмат зрабілі для ўмацавання беларуска-ўкраінскіх культурных сувязяў. Гэта людзі, заўсёды павернутыя тварам да Украіны». Сёлета адначасова з Т. Кабржыцкай і В. Рагойшам прэмія прысуджана галоўнаму рэдактару «Літературної України» Сяргею Куліду, «аўтару шэрага дакументальных кніжак, які ўзяў на сябе адказнасць за лёс пісьменніцкай газеты ў складаных умовах палітычнай і фінансавай разгубленасці».
Дарэчы, у «Літературній Україні» за 14 лютага 2020 года побач з інфармацыяй пра Прэмію імя Дмытра Нітчанкі змешчаны вялікі адкрыты ліст лаўрэата Нацыянальнай прэміі імя Т. Шаўчэнкі, вядомага пісьменніка і выдаўца Міхайла Слабашпіцкага «Нам на Вас пашанцавала». У звароце да беларускіх лаўрэатаў згаданай прэміі аўтар паслання шчыра разважае пра іх вялікі ўклад ва ўмацаванне беларуска-ўкраінскіх культурных узаемаадносін, прапаганду ў Беларусі ўкраінскага мастацкага слова праз пераклад, навуковыя даследаванні, педагагічную практыку, а таксама пра некаторыя праблемы, якія даводзіцца пры гэтым пераадольваць.
Сардэчна віншуем лаўрэатаў!
Прэс-служба Саюз беларускіх пісьменнікаў