Узмоцнена адказнасць за невыкананне планаў мадэрнізацыі

У Беларусі ўзмоцнена адказнасць кіраўнікоў дзяржаўных прадпрыемстваў за невыкананне планаў мадэрнізацыі. Гэта прадугледжана пастановай Савета міністраў ад 18 ліпеня 2013 года № 637. 
 



Як паведамляе прэс-служба ўрада, дакумент прыняты "для ўзмацнення адказнасці кіраўнікоў арганізацый за забеспячэнне развіцця галін і вытворчасцяў, устойлівага росту нацыянальнай эканомікі". 

Згодна з пастановай, невыкананне кіраўніком ці зрыў тэрмінаў выканання мерапрыемстваў, вызначаных у праграме (плане) комплекснай мадэрнізацыі прадпрыемства, на рэалізацыю якіх выдзелены бюджэтныя сродкі, будзе кваліфікавацца як "грубае парушэнне працоўных абавязкаў". Акрамя таго, у кантракты, якія заключаюцца з кіраўнікамі арганізацый, будуць унесены пункты, што прадугледжваюць абавязак кіраўніка забяспечваць выкананне мерапрыемстваў, вызначаных у праграме (плане) комплекснай мадэрнізацыі арганізацыі, і адказнасць за іх невыкананне. 

Дзяржаўным органам і арганізацыям даручана ў двухмесячны тэрмін прывесці кантракты, заключаныя з кіраўнікамі арганізацый, у адпаведнасць з пастановай. Кіраўнікам рэспубліканскіх органаў дзяржаўнага кіравання, іншых дзяржаўных арганізацый, падпарадкаваных ураду, аблвыканкамаў і Мінскага гарвыканкама даручана забяспечыць кантроль за выкананнем узгодненых імі праграм (планаў) комплекснай мадэрнізацыі арганізацый.

Андрэй Серада, БелаПАН