Туркменістан. Выбары з будучыні

У Туркменістане 25 сакавіка адбыліся парламенцкія выбары, якія дакладна трапяць у аналы гісторыі.

Справа не ў выніках галасавання, што ад пачатку былі прадказальныя — усе месцы ў новым Меджылісе атрымалі кандыдаты ад праўладных партый.

Фішка ў тым, што туркменскія дзяржаўныя тэлеканалы пачалі здымаць відэарэпартажы пра парламенцкія выбары ў краіне за два тыдні да пачатку галасавання.

25 сакавіка тыя здымкі былі паказаныя ў якасці матэрыялу, што нібыта знялі ў дзень выбараў. Паводле словаў сведак, здымкі адбывалася наступным чынам: «Сабралі групу бюджэтных работнікаў і падрыхтавалі рэпартажы з выбарчых участкаў. Людзі, запрошаныя для правядзення галасавання, самі запоўнілі бюлетэні. А потым перад камерамі распавядалі, колькі працэнтаў выбаршчыкаў прыйшло». 

Спробы журналістаў узяць каментар наконт незвычайных пастановачных сцэнаў поспеху не мелі. Адказная асоба выбарчай камісіі абмежавалася сцвярджэннем, што гэтыя звесткі «лжывыя», а «ўсё праводзіцца ў адпаведнасці з законам, кодэксам і Канстытуцыяй».

Паводле туркменскай прэсы