«Талібан» прызнаны ў Расіі тэрарыстычнай арганізацыяй, але яго дэлегацыя прыбыла ў Маскву

У Маскве знаходзіцца дэлегацыя палітычнага офіса руху «Талібан», афіцыйна прызнанага тэрарыстычнай арганізацыяй, дзейнасць якой у Расіі забароненая. Пра гэта паведаміла «Інтэрфаксу» інфармаваная крыніца, не стаўшы ўдакладняць мэту і праграму візіту дэлегацыі.

У Маскву прадстаўнікі «Талібану» прыбылі на фоне распачатага ў Афганістане наступу іх сіл на ўрадавыя войскі. У Афганістане «Талібан» актывізаваў баявыя дзеянні пасля таго, як ЗША пачалі выводзіць з краіны свае войскі.

Вайскоўцы ўрадавых сіл, у прыватнасці, адступаюць на тэрыторыю Таджыкістана, дзе знаходзіцца 201-я расійская ваенная база — найбуйнейшы ваенны аб'ект Расіі за яе межамі. 5 ліпеня прэзідэнт Расіі Уладзімір Пуцін паабяцаў дапамогу Таджыкістану ў сувязі з абвастрэннем на мяжы з Афганістанам.

У Маскве ў 2018 годзе ўжо праходзілі кансультацыі з удзелам прадстаўнікоў «Талібану».