СМІ: прычынай крушэння Ту-154 над Чорным морам стала памылка экіпажа

Крушэнне самалёта Ту-154 над Чорным морам у снежні 2016 года адбылося праз памылку экіпажа, паведамляе газета «КоммерсантЪ». Афіцыйна гэтая інфармацыя пакуль не пацверджаная.

Паводле інфармацыі крыніц выдання, эксперты пакуль не ўсталявалі дакладных памылак, што прывялі да авіякатастрофы. Пры гэтым дакладна выключаны варыянт тэхнічнай няспраўнасці самалёта.
Згодна з папярэднімі высновамі камісіі па расследаванні прычынаў крушэння, усе сістэмы самалёта працавалі спраўна да сутыкнення з вадой. Зараз эксперты вывучаюць дзеянні лётчыкаў падчас узлёту Ту-154.
Расследаванне прасоўваецца марудна праз нізкую якасць дадзеных з бартавога самапісца, выпушчанага ў 1980-х гадах, удакладняе «КоммерсантЪ».
Самалёт Ту-154 Міністэрства абароны, які накіроўваўся з Сочы ў Сірыю, разбіўся над Чорным морам 25 снежня 2016 года. Загінулі ўсе 92 чалавекі, якія знаходзіліся на борце — артысты ансамбля імя Аляксандрава, вайскоўцы, журналісты і кіраўнік фонду «Справядлівая дапамога» Лізавета Глінка.
Паводле «Радыё Свабода»