Паломнікаў, якія загінулі ў Мецы, пахаваюць у безыменных магілах

Усе людзі, якія загінулі пры падзенні вежавага крана на галоўную мячэць у Мецы 11 верасня, будуць пахаваныя ў безыменных магілах.



Такое рашэнне было прынята мясцовай адміністрацыяй, бо «мусульмане вераць, што душы памерлых падчас паломніцтва трапляюць адразу ў рай», паведамляе РСН са спасылкай на мясцовыя ўлады.

Па апошніх дадзеных, ахвярамі трагедыі сталі 107 чалавек, яшчэ 230 пацярпелі.

Паводле папярэдняй інфармацыі, кран абрынуўся на мячэць з-за моцнага ветру — у гэтыя дні на Аравійскім паўвостраве бушуе пяшчаная бура.

У гэты ж час Мека рыхтуецца да хаджу, які пройдзе з 21 па 26 верасня. Чакаецца, што на яго прыбудуць некалькі сотняў тысяч паломнікаў.

Вялікая колькасць народу ў Мецы падчас хаджу не раз прыводзіла да трагедый. Так, у 2006 годзе ў цісканіне там загінулі амаль 350 чалавек.