Выведка: Расійскія танкі могуць дайсці да Кіева за 48 гадзін
Ацэнка адмыслоўцаў змяшчае змрочныя прагнозы магчымых страт сярод цывільнага насельніцтва ў выпадку поўнамаштабнага расійскага ўварвання, да 50 тысяч забітых і параненых
Выведка ЗША паведаміла: у выпадку ўварвання ва Украіну расійскія танкі дойдуць да Кіева за 48 гадзін, загінуць 50 тысяч цывільных. Два самыя маштабныя сцэнары ўварвання прадугледжваюць адначасовую атаку з некалькіх бакоў, манеўр вядомы як «абцугі», піша Свабода.
Па ацэнках вайскоўцаў і выведкі ЗША, на якія спасылаецца тэлекампанія NBC, якую цытуе «Голас Амерыкі», магчымыя страты сярод цывільных могуць дасягнуць 50 тысяч забітых і параненых
У выпадку поўнамаштабнага ўварвання ва Украіну расійскія вайскоўцы могуць выкарыстоўваць дзевяць розных маршрутаў, паведаміла тэлекампанія NBC News, спасылаючыся на ацэнкі амерыканскіх вайскоўцаў і выведкі.
Расійскія танкі могуць дайсці да Кіева за 48 гадзін, адзначыла тэлекампанія.
У паведамленні гаворыцца, што Масква ўжо разгарнула каля 100 са 168 сваіх батальённых тактычных груп, кожная з якіх складаецца з 800-900 вайскоўцаў, і з кожным днём іх становіцца ўсё больш.
Паводле гэтых ацэнак, прэзідэнт Уладзімір Пуцін накіраваў у рэгіён асабовы склад і тэхніку шасці падраздзяленняў спецназу, кожнае з якіх складаецца з 250-300 элітных байцоў.
Два самыя маштабныя сцэнары ўварвання мяркуюць адначасовую атаку з некалькіх бакоў, манеўр вядомы як «абцугі», або падвойны ахоп, паведаміла NBC News.
Паводле аднаго з падыходаў, расійскія вайскоўцы захопяць большую частку ўкраінскай тэрыторыі на ўсход ад Дняпра, дзе знаходзіцца каля 50 працэнтаў украінскіх Узброеных сіл, у тым ліку найбольш баяздольныя падраздзяленні, гаворыцца ў паведамленні.
Расійскія танкі і механізаваныя часткі перасякуць мяжу Украіны і рушаць да Палтавы і Харкава, акружаючы гарады па меры прасоўвання да ракі Дняпро. Сухапутныя войскі будуць наступаць па трох кірунках з Данбасу, рухаючыся на поўдзень да Крыма і захопліваючы ўзбярэжжа ўздоўж Азоўскага мора.
Расійскія вайсковыя верталёты будуць адначасова падтрымліваць паветраны напад з анексаванага Крыма, гаворыцца ў паведамленні.
Гэты варыянт таксама можа ўключаць высадку дэсанту для захопу ўзбярэжжа Чорнага мора, а таксама перакідванне авіяцыі і сухапутных падраздзяленняў з Адэсы ў Малдову для стварэння сухапутнага калідора ўздоўж Чорнага мора, адзначыла NBC News.
Расія ўжо размясціла ля берагоў Украіны падводныя лодкі і пяць дэсантных караблёў з батальёнамі марской пяхоты. Яшчэ шэсць, паводле ацэнкі, могуць прыбыць туды праз некалькі дзён, паведаміла тэлекампанія.
Яшчэ больш агрэсіўны варыянт прадугледжвае яшчэ два маршруты атакі з поўначы для акружэння Кіева. Ён уключае выкарыстанне артылерыйскага агню, сродкаў радыёэлектроннай барацьбы і магчымае прасоўванне наземных войскаў на поўдзень з Беларусі да Жытоміра і на ўсход да Кіева, паведаміла NBC News.
Згодна з ацэнкамі, пры добрым стане дарог у гэтым раёне расійскія танкі і вайсковая тэхніка могуць апынуцца на подступах да Кіева за два дні, паведаміла тэлекампанія.
Расійскія вайскоўцы размясцілі ў Беларусі дзве сучасныя сістэмы СПА С-400, якія забяспечаць ім перавагу ў паветры над значнай часткай тэрыторыі краіны з магчымасцю перахопу самалётаў і ракет, паведаміла NBC News.
Абедзве атакі адкрыюцца масіраваным ударам артылерыі, балістычных ракет сярэдняй далёкасці і бамбавікоў. Імаверна, ён будзе ажыццёўлены ноччу і накіраваны на склады боепрыпасаў, радыёлакацыйныя станцыі, авіяцыю і сістэмы СПА, а таксама іншыя крытычна важныя ваенныя аб’екты Украіны, паведаміла тэлекампанія.
Расія паспрабуе пазбавіць Украіну магчымасці абараняцца ў першыя гадзіны, гаворыцца ў ацэнцы. Яна ажыццявіць кібератакі і задзейнічае сродкі радыёэлектроннай барацьбы (глушэння), каб парушыць сувязь паміж украінскімі вайсковымі падраздзяленнямі, размешчанымі ў розных частках краіны.
Ацэнка змяшчае змрочныя прагнозы магчымых страт сярод цывільнага насельніцтва ў выпадку поўнамаштабнага расійскага ўварвання, да 50 тысяч забітых і параненых, паведаміла NBC News.
З сярэдзіны студзеня Расія актыўна перакідала ў Беларусь войскі і вайсковую тэхніку, у тым ліку дывізіён зенітных ракетна-гарматных комплексаў «Панцыр-С», шматмэтавыя знішчальнікі Су-35С, штурмавікі Су-25СМ, зенітны ракетны комплекс С-400 «Трыумф», комплексы «Іскандэры» і іншае ўзбраенне.
У ЗША і краінах ЕС асцерагаюцца, што нейкая частка расійскіх войскаў застанецца ў Беларусі. Прадстаўнікі беларускіх і расійскіх уладаў сцвярджаюць, што пасля вучэнняў усе войскі вернуцца ў месцы сталай дыслакацыі.
Дзярждэпартамент ЗША таксама выказаў асцярогу, што Расія можа выкарыстоўваць войскі, якія размяшчаюцца ў Беларусі, для нападу на Украіну з поўначы. Начальнік Генштаба ВС Беларусі Віктар Гулевіч раней паведаміў, што вучэнні «носяць абарончы характар» і не нясуць ніякай пагрозы «ні для еўрапейскай супольнасці ў цэлым, ні для суседніх краін у прыватнасці».