Выстава твораў Мікалая Залознага (фота)

У Нацыянальным мастацкім музеі Беларусі адкрылася выстава твораў славутага беларускага жывапісцы Мікалая Залознага. На ўрачыстасць прыйшлі дзясяткі людзей, уключна сваякоў мастака, які пакінуў гэты свет больш як 33 гады таму. 



Папярэдні слайдНаступны слайд

Як адзначыла ўкладальніца спецыяльнага каталога твораў майстра Вольга Каваленка, мастацкая спадчына Мікалая Рыгоравіча Залознага (1925–1982), жывапісца магутнага тэмпераменту і каларыстычнага дару, — яркая старонка ў гісторыі беларускага жывапісу. Ягоны творчы шлях быў нядоўгім і драматычным — усяго 20 гадоў. “Але і за гэты нядоўгі перыяд ён змог напісаць творы, якія ўзбагацілі айчынную мастацкую культуру, садзейнічалі стылістычнаму і ідэйнаму абнаўленню беларускага мастацтва 1960–1970-х гадоў”, — падкрэсліла Вольга Каваленка.

Па словах генеральнага дырэктара Нацыянальнага мастацкага музея Беларусі Уладзіміра Пракапцова, выстава твораў мастака і цудоўнага педагога Мікалая Залознага — выбітная падзея ў жыцці ачоленай ім установы. “Прайшлі ўжо дзясяткі гадоў, але такое адчуванне, што ён толькі ўчора пісаў свае творы. Гэта значная падзея, бо гэты чалавек унёс вялікі ўклад у гісторыю мастацтва Беларусі ХХ стагоддзя. Таму я хачу падзякаваць дочкам мастака Жанне Літвіне і Наталлі Залознай, якія прадаставілі творы Мікалая Залознага з калекцыі сям’і, а таксама Беларускаму саюзу мастакоў, нашым супрацоўнікам музея, якія рабілі гэтую выставу. Гэта памяць нашаму славутаму нацыянальнаму дзеячу, мастаку, педагогу і грамадзяніну”, — адзначыў Уладзімір Пракапцоў.

“Сёння сапраўды вялікае свята для мастакоў і для ўсіх прыхільнікаў прыгожага, — сказаў старшыня Беларускага саюза мастакоў Рыгор Сітніца. — Бо імя Мікалая Залознага ва ўсіх не толькі на слыху, але і ў памяці… Калі мы бачым карціну “Макі”, створаную ў 1968 годзе, то такое адчуванне, што гэта зроблена сёння, і зроблена на вышэйшым мастацкім узроўні. Гэта яшчэ раз паказвае, што калі чалавек адораны Госпадам Богам як мастак, ён застаецца мастаком у любых варунках мастаком. І якую б тэматыку не ўвасабляў у сваіх палотнах, ён застаецца творцам, вартым захаплення і памяці пакаленняў”. 

Дачка Мікалая Залознага, былая старшыня Беларускай асацыяцыі журналістаў Жанна Літвіна адзначыла жыццесцвярджальнасць карцін яе бацькі. “Самое ягонае жыццё было з пакутамі, з болем і завяршылася яно вельмі драматычнай падзеяй. І мала хто ведае, што сам Залозны ў сем гадоў апынуўся ў дзіцячым доме разам са сваімі двума братамі. Гэта былі трыццатыя гады, галадамор, іх бацьку саслалі ў Сібір, маці памерла ад сухотаў. У 1945 Мікалай Залозны трапіў у войска і, як потым узгадваў, прайшоў пешшу палову Еўропы. Гэта і вызваленне Аўстрыі, вызваленне Прагі. У яго няма вайсковых рэгаліяў, узнагародаў. Яму потым задавалі пытанне: а колькі вы фрыцаў знішчылі? І я помню абсалютна сумленны бацькаў адказ: ёсць каманда — страляй, я заплюшчу вочы і страляю. У ягоных карцінах вайна таксама знайшла адлюстраванне, але не ў нейкіх батальных сцэнах, але праз шчымлівыя твары жанчын”, — падкрэсліла Жанна Літвіна. 

Яна шчыра падзякавала ўсім, хто спрычыніўся да арганізацыі выставы Мікалая Залознага. З Бельгіі на імпрэзу прыехала і малодшая дачка майстра, таксама вядомая ў свеце мастачка Наталля Залозная з мужам — мастаком Ігарам Цішыным і сынам Мацеем Цішыным, дарэчы, адзіным унукам Мікалая Залознага (на фота). 

Выстава твораў Мікалая Залознага ў Нацыянальным мастацкім музеі Беларусі працягнецца да 11 студзеня 2016 года.