Музей Багдановіча запрашае на «Ракуцёўскае лета»

Філіял Літаратурны музей Максіма Багдановіча запрашае 29 ліпеня на традыцыйнае свята паэзіі і песні «Ракуцёўскае лета».

107 год таму, летам 1911 года, Максім Багдановіч наведаў Беларусь – Вільню і Ракуцёўшчыну. Прыехаў на радзіму малады паэт з Яраслаўля па запрашэнні супрацоўнікаў “Нашай Нівы” Івана і Антона Луцкевічаў. У вёсцы Ракуцёўшчына ў фальварку іх дзядзькі, шляхціца Вацлава Лычкоўскага, будучы класік беларускай літаратуры правёў два цудоўныя летнія месяцы. Гэтае падарожжа на Бацькаўшчыну стала вырашальным для яго творчага шляху, бо менавіта тут, на зямлі продкаў, Максім Багдановіч па-сапраўднаму адчуў сябе беларускім паэтам. У Ракуцёўшчыне нараджаліся вершы і паэмы, якія пазней увайшлі ў адзіны яго прыжыццёвы зборнік паэзіі “Вянок”.
Таму невыпадкова ў адноўленым фальварку кожны год філіял Літаратурны музей Максіма Багдановіча збірае сваіх сяброў і прыхільнікаў творчасці геніяльнага беларускага паэта на традыцыйнае свята паэзіі і песні “Ракуцёўскае лета”.
Праграма свята паэзіі і песні “Ракуцёўскае лета–2018”:11:00 − прывітальная імпрэза каля памятных камянёў і ўскладанне кветак;11:30 − знаёмства з музеем “Фальварак Ракуцёўшчына”, агляд экспазіцыі;12:00 − літаратурна-музычная імпрэза “У родным краі”, удзел у якой возьмуць беларускія пісьменнікі, дзеячы культуры, музыкі.12:00 – 16:00 – інтэрактывы і забавы для наведвальнікаў (батлеечнае прадстаўленне, традыцыйныя беларускія гульні, музейна-педагагічныя заняткі, квэст, салонныя гульні ХІХ ст, бард-сядзібнік).
Праезд электрычкай Мінск–Маладзечна, Маладзечна–Мінск (станцыя Уша) ці маршрутным таксі Мінск–Краснае, Мінск–Маладзечна (вёска Краснае).Для жадаючых будзе арганізавана аўтобусная экскурсія. Падрабязная інфармацыя і запіс па тэлефоне: 8017334-42-69, 8017334-07-61, 801767 96–141.