«Калі апошняе дрэва рухнула, калі рэкі атручаны — вы не можаце есці грошы». Пяць кампазіцый пра экалогію

Сёння адзначаецца Сусветны дзень без аўтамабіля — ініцыятыва, падчас якой мільёны людзей па ўсім свеце адмаўляюцца ад асабістага транспарту, каб зменшыць выкіды вуглякіслага газу, падтрымаць экалогію і перагледзець свае транспартныя звычкі ў бок дэаўтамабілізацыі і развіцця грамадскага транспарту.

 AURORA — The Seed

Надзвычайна моцны і пранізлівы да дрыжыкаў трэк нарвежскай фолк-выканаўцы Аўроры Акснэс. Асновай для стварэння кампазіцыі стала старадаўняя індзейская прымаўка «Калі будзе ссечана апошняе дрэва, з'едзена апошняя рыба і атручаны апошні ручай, вы зразумееце, што есці грошы немагчыма». Пра гэта аўтарка распавядае напачатку кліпа да песні. 

Ён пачынаецца павольна, устойліва і паказвае, што кожнаму чалавеку трэба знайсці дарогу ў жыцці і прайсці праз праблемы, як тое зерне, што расце ў зямлі і цягнецца да святла. Аўрора паказвае знішчаныя чалавечай рукой краявіды, і, насупраць, моц стыхіі, красу прыроды ды тое, як чалавек можа абыходзіцца з Зямлёй. Напрыклад, будаваць ветракі замест атрутных для прыроды электрастанцый і дадаваць багата зелені вакол дарог. Поўнае акунанне ў атмасферу, якую хацела перадаць Аўрора, атрымліваецца дзякуючы яе аўтэнтычнаму прырода-friendly стылю. 

 Дарэчы, Аўрора — даволі папулярная выканаўца і сярод беларускай моладзі. Яе кампазіцыі можна часта пачуць у плэйлістах беларускіх кавярняў.

Слухаць на Spotify

 alyona alyona — Тихо діти сплять

«Ціха дзеці спяць» — сацыяльны маніфест выбітнай спявачкі alyona alyona, якая сёлета прадстаўляла Украіну на Еўрабачанні. Гэта шчыры аповед аб сучасным становішчы ў свеце. Алёна разам з рэжысёрам кліпа Антонам Штукай дэманструюць кадры жорсткіх экалагічных катастроф, аўтамабілізацыі і яе наступстваў, забруджвання паветра, голаду і галечы, вайны на ўсходзе Украіны (песня была прадстаўлена ў 2020 годзе). Пакуль у свеце існуе столькі праблем, з канвеераў зброебудаўнічых фабрык бясконца сыпяцца новыя патроны.

Эмацыйна моцную кампазіцыю Алёна напісала на Балі: выспа паслужыла ідэальным месцам для здымкі кліпа на тэму экалогіі, бо ўваходзіць у 10 самых забруджаных месцаў на планеце. Дзеці ў творы паўстаюць як увасабленне чысціні, адкрытасці і дасведчанасці, а дарослыя як вобраз слепаты, стомленасці і слепаты. 

«Мы ўсе прыйшлі ў гэты свет, каб служыць яму і рабіць яго лепшым. Але ў наш час нават тое, што не мае патрэбы ў паляпшэнні, мы знішчаем, не задумваючыся аб наступствах. Эпоха спажыўцоў, якія жадаюць выкарыстоўваць усё вакол, каб атрымаць кайф і спрасціць сабе жыццё. Мы забыліся, што для сапраўднага шчасця нам не так шмат трэба, што ніякія знешнія даброты не заменяць унутраную пустэчу, мы забыліся, што ўсе зямныя рэсурсы не бясконцыя», — каментуе кампазіцыю сама Алёна. 

Слухаць на Spotify

 Noiзe MC, Монеточка — Живи без остатка

Дзве цацкі, выкінутыя капрызнай дзяўчынкай, лёгка і нязмушана паказваюць, колькі ўсяго мы абвыклі штодня выкідваць, колькі вакол нас аднаразовага, пластыкавага, таго, што мы ўвесь час замяняем на такое ж непатрэбнае новае. Ім ужо няма чаго губляць — дзве лялькі будуць вельмі і вельмі доўга распадацца на часціцы, лежачы ў смеццевых кучах — бо пластык наўрад ці раскладаецца хутка. 

Культавы слог Лізы Манетачкі, бадзёры тэмбр Вані і яркая карцінка — усё прыгожа і на сто адсоткаў перадае праблему. 

Слухаць на Spotify 

Monikа Marijа — Viskas Tavo rankose!

Сваёй кампазіцыяй «Усё ў Тваіх руках!» адна з найбольш вядомых літоўскіх выканаўцаў Моніка Марыя заклікае людзей, якія нарадзіліся і жывуць у экалагічна чыстых краінах, не закрываць вочы на жахі, што адбываюцца ў астатнім свеце.

Моніка распавяла Delfi, што, жывучы ў Літве, ёй заўсёды здавалася, нібы такая ідэальная экалогія і чыстата ўласцівая кожнай дзяржаве безумоўна. Але варта толькі выехаць у падарожжа з роднай краіны, як адкрываецца празаічная рэчаіснасць — неспасціжныя аб’ёмы смецця, непадкантрольнае забруджванне вады, зямлі і паветра.

На яе перакананне, кожны адказны чалавек павінен цікавіцца і пашыраць свае веды аб сітуацыі ў свеце і не толькі павярхоўна прызнаваць паняцці «пацяпленне» або «змена клімату», але ведаць, якія віды жывёл і раслін знікаюць у выніку, які ўплыў гэта аказвае на нас, наша навакольнае асяроддзе і нашу будучыню, і, самае галоўнае, як кожны з нас можа кожны дзень спрыяць змякчэнню гэтых наступстваў або вырашэнню гэтых праблем. Моніка не выкарыстоўвае аднаразовыя пакеты і тару, адмовілася ад пакупкі непатрэбных рэчаў, перадае сцэнічнае адзенне сваякам і на дабрачыннасць. 

Слухаць на Spotify

 Джамала, Freel — Коли закінчаться війни

Падрыў Кахоўскай ГЭС і затапленне Херсоншчыны, знішчэнне Серабранскага лесу і запаведніка «Асканія Нова», атручванне ракі Сейм і спальванне флоры выспы Джыралгач, выкарыстоўванне хімічнай зброі і бясконцы штодзённы ўрон экалогіі — усё гэта дасталося ўкраінскай зямлі.

Нягледзячы на сваю дэпрэсіўнасць і прыгнечанасць, радкі Джамалы і Андрэя Шалімава — гімн дабрыні, перамогі і светлай будучыні. 

Слухаць на Spotify