Ніну Багінскую ўнеслі ў «спіс экстрэмістаў». Хронікі рэпрэсій 15 жніўня

Імя 78-гадовай пенсіянеркі Ніны Багінскай з'явілася ў абноўленым спісе МУС «Пералік грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці».

Нагадаем, 30 красавіка суддзя Максім Трусевіч разгледзеў крымінальную справу супраць актывісткі паводле ч. 2 арт. 342-2 КК. Падставай для крымінальнага пераследу сталі неаднаразовыя адміністрацыйныя пастановы за 2024 год. Пенсіянерку прызналі вінаватай, але замест пакарання прызначылі «прафілактычнае назіранне».

Акрамя Багінскай у «спіс экстрэмістаў» дадалі яшчэ 31 прозвішча — цяпер у ім 5621 чалавек.

«Вясна» публікуе апошнюю версію спіса.

У Гомелі па палітычнай справе асудзілі адваката Сяргея Хлыстова

Яго абвінавачвалі па двух палітычных артыкулах — «распальванне варожасці» (ч. 1 арт. 130 КК) і «заклікі да прычынення шкоды нацыянальнай бяспецы Беларусі» (ч. 3 арт. 361 КК). Які менавіта прысуд вынеслі чальцу Гомельскай абласной калегіі адвакатаў — невядома.

Па інфармацыі «Гомельскай Вясны», Хлыстова затрымалі разам з іншымі двума адвакатамі, у тым ліку з загадчыкам юрыдычнай кансультацыі аднаго з раёнаў Гомеля. Пазней дваіх адвакатаў вызвалілі, а загадчыка юркансультацыі звольнілі з пасады.

Маладога айцішніка з Магілёва асудзілі па чатырох палітычных артыкулах і адправілі ў калонію

Цімафею Караткевічу 23 гады. Ён родам з Магілёва.

У школе Цімафей удзельнічаў у алімпіядах па гісторыі. У 2018-2019 гадах заняў трэцяе месца на абласной алімпіядзе. Пасля гэтага, у 2019 годзе, ён паступіў у Беларуска-расійскі ўніверсітэт на бюджэт на спецыяльнасць «Аўтаматызаваныя сістэмы апрацоўкі інфармацыі», набраўшы 310 балаў з 400 магчымых, піша «Наша Ніва».

Цімафей цікавіцца анімэ, коміксамі і камп'ютарнымі гульнямі.

Дата затрымання Цімафея невядомая, але ён знік з сацсетак увесну. Яго ўжо паспелі асудзіць па чатырох артыкулах — «абраза Лукашэнкі» (ч. 1 арт. 368 КК), «паклёп на Лукашэнку» (ч. 1 арт. 367 КК), «абраза прадстаўніка ўлады» (арт. 369) і «ўступленне ў склад экстрэмісцкага фармавання» (ч. 3 арт. 361-1).

Хлопцу пагражала да шасці гадоў калоніі. Сутнасць абвінавачання, як і дакладны прысуд, невядомыя.